27 сакавіка, Позірк. Падчас батальённых тактычных вучэнняў з падраздзяленнямі войскаў Заходняга аператыўнага камандавання на 230-м агульнавайсковым палігоне (Баранавічы, Брэсцкая вобласць) вайскоўцы адпрацавалі штурм населенага пункта, паведаміла прэс-служба Міністэрства абароны.
Былі задзейнічаныя артылерыйскія падраздзяленні і беспілотныя авіяцыйныя комплексы, адзначае ведамства.
“Таксама вайскоўцы ўсталёўвалі мінна-выбуховыя загароды і задзейнічалі рухомую акустычную ўстаноўку для дэмаралізацыі ўмоўнага праціўніка”, — паведаміла Мінабароны.
Падчас “мерапрыемстваў баявой падрыхтоўкі” беларускія ракетчыкі і артылерысты “ўлічваюць досвед спецыяльнай ваеннай аперацыі” (за такой фармулёўкай Крэмль і яго сатэліт Мінск хаваюць поўнамаштабную агрэсію Расіі супраць Украіны), заявіў начальнік ракетных войскаў і артылерыі Узброеных сіл Руслан Чэхаў.
Паводле яго слоў, шырока выкарыстоўваюцца найноўшыя сродкі сувязі, сучасныя гаджэты. Прымяненне сродкаў разведкі з дапамогай беспілотнікаў самалётнага тыпу і квадракоптараў “выйшла на новы ўзровень”.
