Міжнародны інстытут прэсы патрабуе вызваліць асуджаных журналістаў Карнея і Толчына

3 красавіка, Позірк. Вызваліць асуджаных у Беларусі журналістаў Ігара Карнея і Андрэя Толчына запатрабаваў Міжнародны інстытут прэсы (IPI), які выступіў 3 красавіка з адпаведнай заявай.

Вынесеныя ім выракі паказваюць, што рэжым Аляксандра Лукашэнкі “не спыніцца ні перад чым у сваіх рэпрэсіях супраць незалежных СМІ і грамадзянскай супольнасці ў Беларусі”, канстатаваў намеснік дырэктара IPI Скота Грыфена.

“Мы працягваем салідарызавацца з <…> пераследаваным беларускім медыясектарам. Патрабуем вызвалення зняволеных журналістаў, а таксама заклікаем улады пачаць дыялог з грамадствам, каб забяспечыць асноўныя правы грамадзян, у тым ліку свабоду прэсы”, — дадаў ён.

Беларускія СМІ “працуюць у выключна варожым асяроддзі”, заявіў IPI. Арганізацыя звярнула ўвагу на тое, што незалежныя выданні названыя “экстрэмісцкімі” і забароненыя, вымушаныя працаваць у выгнанні, паколькі “супраца з “экстрэмісцкім” фарміраваннем у Беларусі з’яўляецца крымінальным злачынствам”.

22 сакавіка Мінскі гарадскі суд прыгаварыў Ігара Карнея, які доўгі час супрацоўнічаў з незалежнымі медыя, да 3 гадоў пазбаўлення волі паводле ч. 3 арт. 361¹ Крымінальнага кодэкса (стварэнне экстрэмісцкага фарміравання або ўдзел у ім).

Яго затрымалі 17 ліпеня 2023 года, у доме журналіста адбыўся вобшук. Першапачаткова Карнея арыштавалі на 10 сутак нібыта за падпіску на “экстрэмісцкія” рэсурсы. Праз крымінальныя абвінавачанні на волю ён так і не выйшаў.

64-гадовы былы журналіст Андрэй Толчын быў затрыманы 27 верасня 2023 года. 21 сакавіка 2024 года Гомельскі абласны суд прыгаварыў яго да 2,5 года пазбаўлення волі паводле ч. 2 арт. 367 (паклёп у дачыненні да прэзідэнта) і 369¹ (дыскрэдытацыя Рэспублікі Беларусь) Крымінальнага кодэкса. Першапачаткова яму інкрымінавалі таксама ч. 1 арт. 361⁴ КК (садзейнічанне экстрэмісцкай дзейнасці).

Толчын — стваральнік гомельскай гарадской газеты “Гомельскія ведамасці”, а таксама фрылансер, які супрацоўнічаў з некалькімі незалежнымі выданнямі. Яго неаднаразова затрымлівалі і судзілі за журналісцкую дзейнасць. Пасля падзеяў 2020 года Толчын сышоў з прафесіі.

Беларуская праваабарончая супольнасць прызнала Карнея і Толчына палітвязнямі.

Паводле даных Беларускай асацыяцыі журналістаў, зараз у няволі знаходзяцца 34 прадстаўнікі СМІ.

Міжнародны інстытут прэсы — глабальная сетка рэдактараў, кіраўнікоў СМІ і вядучых журналістаў, якія падзяляюць агульную прыхільнасць якаснай, незалежнай журналістыцы. Разам яны садзейнічаюць стварэнню ўмоў, якія дазваляюць журналістыцы выконваць свае грамадскія функцыі, найважнейшай з якіх з’яўляецца магчымасць СМІ працаваць без умяшання і без страху пераследу.