Золатавалютныя рэзервы Беларусі за месяц павялічыліся на 1,6%

5 красавіка, Позірк. Міжнародныя рэзервовыя актывы Беларусі (ЗВР) на 1 красавіка паводле папярэдніх звестак склалі 8 млрд 352,5 млн долараў, павялічыўшыся за месяц на 133,9 млн долараў (1,6%), вынікае са звестак Нацыянальнага банка.

ЗВР у манетарным золаце павялічыліся на 291 млн долараў (3 млрд 843,8 млн).

Кошт рэзерваў па спецыяльных правах запазычання (СДР) таксама вырасл — на 1,2 млн (1 млрд 370,1 млн).

Вага замежнай валюты ў рэзервах зменшылася на 158,1 млн (3 млрд 138,5 млн).

Рэзервовая пазіцыя ў МВФ (0,03 млн долараў) засталася ранейшай, іншыя актывы сталі меншымі на 0,2 млн (0,1 млн долараў).

У студзені золатавалютныя рэзервы скараціліся на 33,9 млн долараў (0,4%), у лютым выраслі на 125,1 млн долараў (1,5%).

На 1 студзеня 2023 года ЗВР складалі 7 млрд 929,5 млн долараў, 1 лютага — 8 млрд 142,8 млн, 1 сакавіка — 7 млрд 769,5 млн, 1 красавіка — 8 млрд 98,6 млн, 1 траўня — 7 млрд 968,2 млн, 1 чэрвеня — 7 млрд 872,1 млн, 1 ліпеня — 7 млрд 791,5 млн, 1 жніўня — 7 млрд 973,5 млн, 1 верасня — 7 млрд 991,2 млн, 1 кастрычніка — 7 млрд 925 млн, 1 лістапада — 8 млрд 147,1 млн, 1 снежня — 8 млрд 255,6 млн; 1 студзеня 2024 — 8 млрд 127,4 млн, 1 лютага — 8 млрд 93,5 млн, 1 сакавіка — 8 млрд 218,6 млн).

Паводле найважнейшых прагнозных (дэ-факта планавых) параметраў развіцця краіны на 2024 год, зацверджаных Аляксандрам Лукашэнкам 2 кастрычніка 2023 года ўказамі № 307 і 308, міжнародныя рэзервовыя актывы на канец года павінны скласці не менш за 6 млрд долараў.