Мінск прайграў выбары ў Камісію ААН па прадухіленні злачыннасці і крымінальным правасуддзі — АПК

10 красавіка, Позірк. Афіцыйны Мінск прайграў выбары ў Камісію ААН па прадухіленні злачыннасці і крымінальным правасуддзі, паведамляе прадстаўніцтва Аб’яднанага пераходнага кабінета (АПК) па замежных справах.

Паводле інфармацыі АПК, у выніку галасавання 9 красавіка у склад камісіі ад Усходнееўрапейскай групы былі абраныя Албанія і Латвія. “Рэжым выкінулі з камісіі, куды ён абіраўся з 2010 года, а дэмакратычны рух атрымаў важную перамогу ў справе выціскання дыктатуры з міжнароднай арэны”, — гаворыцца ў паведамленні.

“Для беларусаў рэжым [Аляксандра] Лукашэнкі асацыюецца з карупцыяй, падкантрольнымі судамі, беззаконнем на ўзроўні “часам не да законаў”, — пракаментаваў гэты факт кіраўнік прадстаўніцтва, намеснік кіраўніцы АПК Валер Кавалеўскі. — Рэжым не супрацьдзейнічае злачыннасці, ён яе памнажае і ёю карыстаецца. Але, насуперак відавочнай рэальнасці, дыктатура спрабавала абрацца ў Камісію ААН па папярэджанні злачыннасці і крымінальным правасуддзі”.

Адзначаецца, што профільнае прадстаўніцтва “праінфармавала ўсіх членаў Эканамічнага і Сацыяльнага Савета ААН” пра “злосныя парушэнні рэжымам Лукашэнкі абавязальніцтваў у галіне супрацьдзеяння злачыннасці” і заклікала “катэгарычна адрынуць яго кандыдатуру на гэтых выбарах”.

Дэмсілы паведамілі членам савета, што “рэжым дэманстратыўна адмаўляецца супрацоўнічаць з органамі ААН і мае жахлівы спіс парушэнняў правоў чалавека, здзяйсняе міжнародныя злачынствы і злачынствы супраць чалавечнасці”.

Прадстаўніцтва АПК па замежных справах таксама нагадала ААН пра тое, што рэжым у Мінску парушае абавязальніцтвы “ў блоку “Мір, справядлівасць і ўстойлівыя інстытуты” у рамках глабальных Мэтаў устойлівага развіцця”, груба парушыў “нормы міжнароднага права ў галіне грамадзянскай авіяцыі, паставіўшы ў рызыкоўнае становішча жыцці дзясяткаў людзей” (верагодна, гаворка пра прымусовую пасадку ў траўні 2021 года ў Мінску самалёта Ryanair, які ляцеў з Афін у Вільнюс).

Рэжым Лукашэнкі, падкрэсліла профільнае прадстаўніцтва АПК, таксама “з’яўляецца саўдзельнікам злачыннай агрэсіі Расіі супраць Украіны”.

“Мы дзякуем членам Эканамічнага і Сацыяльнага Савета, якія ўлічылі аб’ектыўныя факты пра злачынную прыроду рэжыма Лукашэнкі і прагаласавалі супраць спробы легітымізацыі злачынстваў рэжыму”, — адзначыў Кавалеўскі.