Ваенпрам “у інтарэсах сілавых структур” правёў выпрабаванні модуля для скіду гранат з беспілотнікаў

10 красавіка, Позірк. Абароннае прадпрыемства “Завод дакладнай электрамеханікі” “распрацавала і паспяхова правяло” выпрабаванні модуля для скіду гранат з дапамогай беспілотных лятальных апаратаў (БПЛА), паведаміў 10 красавіка Дзяржаўны ваенна-прамысловы камітэт (ДВПК).

Выпрабаванні “ўніфікаванага выбухова-стабілізуючага модуля” (УВСМ) праведзеныя на адным з палігонаў, выкарыстоўваліся ручныя аскепкавыя гранаты і ўдарныя БПЛА, удакладняе ведамства.

Падкрэсліваецца, што выпрабаванні праведзеныя “ў інтарэсах сілавых структур”.

У Дзяржваенпраме адзначылі, што”ў адрозненне ад функцыянавання ручных гранат са штатным запалам, УВСМ выклікае дэтанацыю ручных гранат за кошт інэрцыйнага ўдарнага механізму”.

Асаблівасцямі модуля, як заяўляе ГВПК, з’яўляюцца “прастата зборкі, у тым ліку і ў палявых (палігонных) умовах; бяспека пры службовым выкарыстанні; прымяненне ўдарнымі БПЛА з вышыні 50 метраў і больш; магчымасць яго ўстаноўкі ў корпус ручной гранаты”.

22 лютага Завод дакладнай электрамеханікі быў уключаны ў пакет санкцый, уведзеных Вялікабрытаніяй напярэдадні другой гадавіны расійскага ўварвання ва Украіну.

Завод з’яўляецца кіруючай кампаніяй холдынгу “Высокадакладная электрамеханіка”. Паводле інфармацыі на сайце холдынгу, там вырабляюцца ракетнае ўзбраенне, авіяцыйныя бомбы малога калібра, мішэнныя комплексы, імітатары паветраных цэляў, мадэрнізаваныя ракетныя снарады, камбінаваныя навігацыйныя сістэмы і комплексы тэлеметрычнай апаратуры.