ЦВК пастанавіў правесці УНС 24–25 красавіка, як і патрабаваў Лукашэнка
16 красавіка, Позірк. Першае пасяджэнне Усебеларускага народнага сходу (УНС) сёмага склікання пройдзе 24–25 красавіка ў Мінску. Цэнтральная выбарчая камісія зацвердзіла даты 16 красавіка, вынікае з паведамлення тэлеграм-канала гэтага органа.
Старшыня ЦВК Ігар Карпенка адзначыў, што для падрыхтоўкі да УНС быў створаны рэспубліканскі аргкамітэт, які ўзначаліў прэм’ер-міністр Раман Галоўчанка, было праведзена некалькі нарад. Варта адзначыць, што на адным з іх, 18 сакавіка, Аляксандр Лукашэнка распарадзіўся правесці УНС менавіта ў тыя даты, якія ў выніку і замацаваў Цэнтрвыбаркам.
Паводле звестак ЦВК, ад мясцовых саветаў дэпутатаў у склад дэлегатаў УНС выбрана 290 дэлегатаў: ад Мінскай вобласці — 60, Гомельскай — 55, Брэсцкай — 52, Віцебскай — 44, Магілёўскай — 41, Гродзенскай — 38.
Мінскі гарадскі савет на сходзе будуць прадстаўляць 60 дэпутатаў.
Самаму сталаму дэлегату ад дэпутацкіх структур 71 год, самаму маладому — 18.
Ад праўладных грамадскіх аб’яднанняў у склад дэлегатаў УНС трапіла 400 дэлегатаў — па 80 ад Беларускага грамадскага аб’яднання ветэранаў, Беларускага рэспубліканскага саюза моладзі, Беларускага саюза жанчын, РГА “Белая Русь” і Федэрацыі прафсаюзаў Беларусі.
Вышэйшую адукацыю маюць 356 з 400 дэлегатаў, навуковыя ступені — 26. Максімальны ўзрост дэлегата ад аб’яднанняў — 79 гадоў, мінімальны — 18.
Паводле абноўленай рэдакцыі Канстытуцыі, УНС з’яўляецца “вышэйшым прадстаўнічым органам народаўладдзя”, які вызначае “стратэгічныя напрамкі развіцця грамадства і дзяржавы”, забяспечвае “непахіснасць канстытуцыйнага ладу, пераемнасць пакаленняў і грамадзянскую згоду”. Максімальная колькасць дэлегатаў УНС — 1.200, тэрмін іх паўнамоцтваў — пяць гадоў. Пасяджэнні УНС павінны праводзіцца не радзей як адзін раз на год.
УНС будзе зацвярджаць асноўныя напрамкі ўнутранай і знешняй палітыкі, ваенную дактрыну, канцэпцыю нацыянальнай бяспекі, праграмы сацыяльна-эканамічнага развіцця; заслухоўваць штогадовыя пасланні прэзідэнта да парламента; у яго будзе права заканадаўчай ініцыятывы, яно зможа прапаноўваць змены і дапаўненні ў Канстытуцыю, разглядаць пытанне пра легітымнасць выбараў ды інш.