43 чалавекі звярнуліся па дапамогу пасля ДТЗ на Смілавіцкім тракце ў Мінску — Міністэрства аховы здароўя

16 красавіка, Позірк. 43 чалавекі звярнуліся з траўмамі ў бальніцы Мінска і Мінскай вобласці пасля дарожна-танспортнага здарэння на Смілавіцкім тракце, паведамляе тэлеграм-канал Міністэрства аховы здароўя.

Паводле інфармацыі ведамства, брыгады хуткай медыцынскай дапамогі даставілі ў прыёмныя аддзяленні “больш за 30 пацярпелых”. “Тром пасажырам аказаная меддапамога на месцы ДТЗ, яшчэ некалькі чалавек прыбылі ў бальніцы самастойна”, усяго было задзейнічана восем брыгад хуткай меддапамогі, гаворыцца ў паведамленні.

“Ва ўстановах аховы здароўя пасля правядзення дыягностыкі восем пацыентаў былі шпіталізаваныя, — удакладняе Мінздароўя. — Двум праведзеныя аператыўныя ўмяшанні. У часткі пацярпелых дыягнаставаныя спалучаныя траўмы рознай ступені: чэрапна-мазгавыя траўмы, пераломы, удары і ірваныя раны. Астатнім пацыентам аказаная меддапамога ў прыёмных аддзяленнях бальніц”.

Следчы камітэт паведаміў аб сутыкненні ў Мінску пасажырскага аўтобуса з грузавіком раніцай 16 красавіка. Паведамлялася, што паводле папярэдняй інфармацыі, ў ДТЗ пацярпела “больш за 20 чалавек, у тым ліку двое непаўналетніх”.

Раней Міністэрства ўнутраных спраў паведамляла пра 14 пацярпелых. Акрамя таго, МУС заяўляла, што аварыя адбылася “каля 8:10”, а паводле даных СК — каля 7:00.

За рулём аўтобуса, які заехаў у седлавы цягач Volvo, які стаяў на абочыне, быў 55-гадовы кіроўца, адзначае ведамства.

6 красавіка ў сталіцы маршрутнае таксі сутыкнулася з прыпаркаванымі аўтамабілямі, шпіталізацыя спатрэбілася чатыром пасажырам. Раней у той жа дзень іншая маршрутка ўрэзалася ў трактар, дзевяць з дзесяці пацярпелых адвезлі ў бальніцы.