Для вызвалення Пачобута Польшчы варта цалкам перакрыць грузавыя зносіны з Беларуссю — Латушка

16 красавіка, Позірк. Для вызвалення журналіста Анджэя Пачобута і “тысяч іншых палітвязняў” Польшчы варта “пайсці на прынцып” і “цалкам перакрыць грузавыя зносіны з Беларуссю, у тым ліку чыгуначныя”, перакананы намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.

Такое меркаванне ён выказаў у аўтарскім артыкуле для ўплывовага польскага выдання Gazeta Wyborcza. Асноўныя тэзісы публікацыі палітык выклаў у сваім ютуб-канале.

Прыпыненнем грузавога транзіту, на думку Латушкі, Варшава “ўключыць у развязанне праблемы Лукашэнкі яшчэ і Кітай”. Гэта таксама паспрыяе спыненню “нападаў нелегальнымі мігрантамі”.

“Як доўга гэта будзе працягвацца? Як доўга будуць працягвацца рэпрэсіі ў Беларусі, здзекі і катаванні над палітвязнямі? Як доўга Лукашэнка будзе працягваць набіраць і ўтрымліваць закладнікаў? Як доўга будзе працягвацца гібрыдная агрэсія Лукашэнкі супраць Польшчы і іншых краін ЕС?” — задае пытанні ў артыкуле Латушкі.

Для эфектыўных адказаў, лічыць ён, “неабходная магутная палітычная воля”.

“Дыктатар разумее толькі адну мову — мову прынцыповасці і сілы. Мова яшчэ большага ціску”, — заяўляе кіраўнік НАУ.

Лукашэнку, паводле яго слоў, “не палохаюць платы і закрытыя памежныя пераходы”, “магчымасць для перамяшчэння [праз мяжу] простых беларусаў яго ў прынцыпе не турбуе”. “А дакладней, — удакладняе Латушка, — яго задаволяць цалкам закрытыя для такога перамяшчэння межы”.

Не страшныя Мінску, паводле пераканання палітыка, і “бягучыя гандлёвыя санкцыі і абмежавальныя паўмеры, бо яны носяць абмежаваны характар”.

Пачобута Латушка называе “адным з тысяч закладнікаў рэжыму Лукашэнкі, кінутых дыктатарам за краты”.

“Тры гады для палітвязня ў Беларусі — гэта не проста тэрмін адседкі. Гэта тры гады знаходжання ў нечалавечых умовах пад пастаянным прэсінгам. Гэта тры гады пекла. Перажыць якое атрымоўваецца не ва ўсіх”, — адзначае кіраўнік НАУ.

Згадваючы пра “шэсць выпадкаў смерці палітвязняў у Беларусі”, ён канстатуе, што “Анджэй Пачобут, які мае праблемы з сэрцам, падвяргаецца ізаляцыі, пазбаўленню перадач і камунікацыі са знешнім светам”.

“Са жніўня мінулага года Анджэй сядзіць у памяшканні камернага тыпу. Яго ўжо некалькі разоў змяшчалі ў штрафны ізалятар. <…>. Ён неаднаразова адмаўляўся пісаць Лукашэнку прашэнне аб памілаванні”, — гаворыцца ў артыкуле палітыка.

Вызваліць журналіста, нагадвае Латушка, не дапамагаюць “усе дыпламатычныя намаганні Польшчы, розныя рэзалюцыі міжнародных арганізацый, закрыццё шэрагу памежных пераходаў”.

“Помслівы Лукашэнка не робіць гэтага”, — падкрэслівае Латушка.

Актывіст неафіцыйнага Саюза палякаў Беларусі (СПБ), журналіст Анджэй Пачобут быў затрыманы ў сакавіку 2021 года.

8 лютага 2023 года Гродзенскі абласны суд прыгаварыў яго да 8 гадоў пазбаўлення волі ў калоніі ўзмоцненага рэжыму. Суддзя Дзмітрый Бубенчык прызнаў яго вінаватым паводле ч. 3 арт.130 (распальванне расавай, нацыянальнай, рэлігійнай або іншай сацыяльнай варожасці або варожасці) і ч. 3 арт. 361 (заклікі да захадаў абмежавальнага характару (санкцый), накіраваных на прычыненне шкоды нацыянальнай бяспецы) КК.

Пасля вынясення палітычна матываванага прысуду журналісту 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).