Праз пажар прыпынены рух у пункце пропуску Мядзінінкай на мяжы Беларусі і Літвы

19 красавіка, Позірк. Праз пажар у пункце пропуску Мядзінінкай (з беларускага боку Каменны Лог) прыпынены рух транспарту ў абодвух напрамках, паведамляе Дзяржаўны мытны камітэт Беларусі.

Паводле інфармацыі ведамства, узгаранне адбылося ў ангары Віленскай тэрытарыяльнай мытні.

Паведамленне аб пажары паступіла ў экстранныя службы ў 2:40 19 красавіка. Агонь быў патушаны ў 6:49.

Паводле звестак літоўскай паліцыі, інцыдэнт адбыўся падчас дагляду аўтамабіля Porsche Cayenne. У выніку згарэў аўтамабіль, даглядальны ангар і частка адміністрацыйнага будынка. Адзначаецца, што ў выніку здарэння людзі не пацярпелі.

Пра прычыны ўзгарання не паведамляецца.

17 красавіка стала вядома, што ў сярэдзіне траўня Літва можа закрыць пункт пропуску Шальчынінкай (Беняконі).

18 жніўня 2023 года Літва закрыла пункты пропуску Шумскас (Лоша) і Твярачус (Відзы), 1 сакавіка 2024-га — Лаварышкес (Катлоўка) і Райгардас (Прывалка). На мяжы з Беларуссю працягваюць працаваць два памежныя пераходы — Мядзінінкай і Шальчынінкай.