“Экстрэмісцкім фарміраваннем” прызнана ініцыятыва “Да зораў”

22 снежня, Позірк. “Экстрэмісцкім фарміраваннем” прызнана ініцыятыва “Да зораў”, вынікае з адпаведнага спісу на сайце Міністэрства ўнутраных спраў.

Рашэнне прынята КДБ 17 снежня, запіс унесены ў пералік МУС 22 снежня.

Сцвярджаецца, што да “фармавання” маюць дачыненне 20-гадовы Сямён Малашэнкаў і 44-гадовы ўдзельнік гурта сярэднявечнай музыкі “Стары Ольса” Аляксандр (Алесь) Чумакоў.

У спісе згадваецца старонка праекту ў “Інстаграме“.

Тэлеграм-канал “Мая краіна Беларусь” і сайт “Наша Ніва” распаўсюдзілі інфармацыю аб затрыманні Чумакова.

Паводле даных праваабарончага цэнтру “Вясна“, затрыманні па справе ініцыятывы прайшлі ў канцы лістапада. Аднак хто канкрэтна быў затрыманы, праваабаронцам невядома.

“Да зораў” — праект аб беларускай культуры, гісторыі і музыцы, які дзейнічае ў сацыяльных сетках.