Долар, юань і еўра патаннелі на першых біржавых таргах тыдня

22 красавіка, Позірк. Амерыканская, кітайская і агульная еўрапейская валюты патаннелі на таргах Беларускай валютна-фондавай біржы 22 красавіка.

Курс долара знізіўся да 3,2515 рубля (-0,0101, -0,31%), юаня — да 4,4747 рубля за 10 (-0,0127, -0,28%), еўра — да 3,4587 рубля (-0,0141, -0,41%).

Расійскі рубель падаражэў да 3,4844 рубля за 100 (+0,0032, +0,09%).

На мінулым працоўным тыдні (15–19 красавіка) знізіліся курсы ўсіх асноўных замежных валют: долара — на 0,07% (з 3,264 да 3,2616), юаня — на 0,06% (з 4,49 да 4,4874 за 10), расійскага рубля — на 0,27% (з 3,4907 да 3,4812 за 100), еўра — на 0,78% (з 3,5 да 3,4728).

Афіцыйны курс долара ў Беларусі ў студзені знізіўся на 0,01% (з 3,1775 да 3,1771 рубля) — гэта быў шосты паказчык на тэрыторыі былога СССР; у лютым — вырас на 1,95% (да 3,2391) — другое месца пасля Расіі (2,89%), за два месяцы — на 1,94% (шостае месца); у сакавіку — вырас на 0,33% (да 3,2498) — пятае месца, за тры месяцы — на 2,28% (трэцяе).

За 2023 год яго каціроўка павялічылася на 16,12% (з 2,7364 да 3,1775 рубля). Гэта другі паказчык на постсавецкай прасторы, сведчыць праведзены “Позіркам” параўнальны аналіз каціровак цэнтрабанкаў на 31 снежня 2022 года і 31 снежня 2023-га. На першым месцы Расія — 27,51% (з 70,3375 да 89,6883 рубля).