Мінэканомікі: ІП па-ранейшаму змогуць займацца гандлем, перавозкамі, будаўнічымі работамі

23 красавіка, Позірк. У пілотны пералік відаў дзейнасці, якія змогуць ажыццяўляць індывідуальныя прадпрымальнікі пасля прынятых змяненняў у заканадаўстве, уключаны рознічны гандаль, паслугі па перавозцы пасажыраў, будаўнічыя работы, якія не патрабуюць “сур’ёзнай тэхналагічнай падрыхтоўкі”, заявіла ў эфіры тэлеканала “Беларусь 1” намеснік дырэктара дэпартамента па прадпрымальніцтве Мінэканомікі Ірына Бабачонак.

Паводле яе слоў, канчатковы спіс урад павінен падрыхтаваць да 1 ліпеня.

Бабачонак адзначыла, што падпісаны Аляксандрам Лукашэнкам закон па пытаннях прадпрымальніцтва “не перашкаджае працягу дзейнасці ІП”.

“Перш за ўсё гэта пытанні канкурэнцыі. Адзін і той жа від дзейнасці можа рэалізоўвацца ў розных выявах. Гэта можа быць самазанятая асоба, ІП, юрыдычная асоба. У прыватнасці, цырульні паслугі, калі, па сутнасці, адзін від дзейнасці рэалізуецца ў некалькі розных умовах. І тыя ж камерцыйныя арганізацыі наракаюць на тое, што калі гэта аднаасобнае прадастаўленне паслуг, то тут некалькі скажаецца канкурэнтнае поле”, — сказала чыноўніца.

Міністр эканомікі Юрый Чабатар, каментуючы падпісанне Лукашэнкі 22 красавіка закона па пытаннях прадпрымальніцкай дзейнасці, сказаў, што галоўная мэта дакумента — стварыць дадатковыя стымулы для таго, каб малы бізнес у Беларусі ўзбуйняўся.

Кіраўнік ведамства назваў тры перавагі новага закона: магчымасць перарэгістрацыі ІП у юрыдычную асобу за адзін дзень, захаванне для такіх юрыдычных асоб спрошчанага адміністравання і дадатковыя меры фінансавай падтрымкі малога бізнесу. “Гэта істотная матывацыя для бізнесу да таго, каб пераходзіць у форму юрыдычнай асобы”, — лічыць Чабатар.

Чыноўнік пакінуў без каментара негатыўныя бакі новага дакумента.

Згодна з законам, па відах дзейнасці, якія не ўвойдуць у плануемы пералік, з 1 кастрычніка спыняецца рэгістрацыя новых індывідуальных прадпрымальнікаў.

Таксама ўстанаўліваецца абавязак пераходу да 1 студзеня 2026 года дзеючых індывідуальных прадпрымальнікаў у юрыдычныя асобы. Для такіх прадпрымальнікаў ўводзіцца “спрошчаны парадак пераходу ў камерцыйныя арганізацыі з пераемнасцю па ўсіх правах і абавязацельствах перад бюджэтам і контрагентамі”.