Дачка палітвязня Кастусёва выйшла на волю пасля трох сутак у ізалятары

25 красавіка, Позірк. Кацярына Кастусёва — дачка палітвязня, лідара дэ-юрэ ліквідаванай Партыі БНФ Рыгора Кастусёва — 25 красавіка выйшла на волю пасля трох сутак у ізалятары часовага ўтрымання УУС Магілёўскага аблвыканкама, паведамляе праваабарончы праект MAYDAY.TEAM.

Падрабязнасцяў пакуль няма.

Жанчыну затрымалі 22 красавіка. На відэазапісе, апублікаваным 24 красавіка праўладным тэлеграм-каналам, яна кажа, што ў 2020 годзе “аказвала садзейнічанне экстрэмісцкаму фарміраванню “Вясна” і ў 2021 годзе зарэгістравалася ў боце плана “Перамога”.

Кацярына Кастусёва — сярэдняе дзіця Рыгора Кастусёва і яго жонкі Ларысы, якія пражылі ў шлюбе 44 гады. Старэйшая сястра і малодшы брат з сем’ямі жывуць за мяжой.

Менавіта Кацярына Кастусёва дапамагае асуджанаму бацьку, возіць яму перадачы. У інтэрв’ю блогу “Адлюстраванне” ў 2021 годзе яна распавяла, як дае гэтаму рады: “Бываюць усякія моманты. Часам вельмі трывожна, бо не ведаеш, чым скончыцца ўся гэтая сітуацыя. Не ведаеш, як будуць паводзіць сябе ўлады, ці хопіць у таты сіл гэта вытрымаць. Здараецца, паплачаш, ноч не паспіш, а на раніцу ідзеш далей, як кажуць, змагацца”.

4 красавіка стала вядома, што адразу пасля правядзення медыцынскай маніпуляцыі анкахворага палітвязня, 66-гадовага Кастусёва адправілі ў камеру. Палітыку вывелі катэтар з мачавога пузыра. Паводле медыцынскіх крыніц, такую маніпуляцыю робяць для вываду мачы або для выканання некаторых лячэбных задач. Звычайна яна праводзіцца раз на тры-чатыры тыдні.

15 студзеня суд Івацэвіцкага раёна пастанавіў замяніць Кастусёву рэжым утрымання на турэмны. Летась у лістападзе паведамлялася, што мужчына знаходзіцца ў памяшканні камернага тыпу, у чэрвені і ліпені палітыка сама меней чатыры разы адпраўлялі ў штрафны ізалятар на 10 сутак. Яго пазбавілі спатканняў са сваякамі, у яго адабралі асабістыя запісы і кантакты для перапіскі.

Кастусёў знаходзіцца ў няволі з 12 красавіка 2021 года. 5 верасня 2022 года Мінскі абласны суд (суддзя Уладзімір Арэшка) прыгаварыў палітыка да 10 гадоў пазбаўлення волі паводле ч. 1 арт. 357 КК (змова з мэтай захопу ўлады неканстытуцыйным шляхам) у рамках палітычна матываванай “справы змоўшчыкаў”. Кастусёў віну не прызнаў.

29 лістапада 2022 года Вярхоўны суд адхіліў яго скаргу і пакінуў вырак у сіле.

9 снежня 2022 года МУС унесла палітвязня ў пералік асоб, “датычных да экстрэмісцкай дзейнасці”.

14 жніўня 2023 года Вярхоўны суд ліквідаваў Партыю БНФ. Палітычная структура, пазбаўленая рэгістрацыі ў Беларусі, працягвае існаваць, яе суб’ектнасць прызнаецца на міжнародным узроўні.