Ціханоўская анансавала марш у Варшаве з нагоды Дня Волі

20 сакавіка, Позірк. Марш у Варшаве з нагоды Дня Волі анансавала ў сваім тэлеграм-канале дэмакратычны лідар Святлана Ціханоўская.

Марш запланаваны на 28 сакавіка. “Я ўжо чакаю нашай сустрэчы!” — адзначыла палітык.

Дзень Волі, паводле яе слоў, гэта “свята, якое заўсёды збірае беларусаў разам”. “Мы сустракаемся ў розных гарадах і краінах, каб нагадаць, што нягледзячы на ўсе выклікі, усе складанасці мы разам. І мы працягваем барацьбу”, — падкрэсліла Ціханоўская.

“Так, сёння мы раскіданыя па ўсім свеце, але не адмовіліся ад нашых мараў і мэтаў. Беларусь жыве ў нас, дзе б мы ні былі”, — дадала яна.

“І калі ў вашым горадзе плануецца мерапрыемства або акцыя, якую праводзіць мясцовая дыяспара, далучайцеся. Бярыце з сабой сцягі — беларускія і ўкраінскія, сімволіку, але таксама не забывайце прытрымлівацца правілаў бяспекі”, — адзначыла Ціханоўская.

3 сакавіка стала вядома, што старшынёй аргкамітэта святкавання Дня Волі абраны былы палітвязень, палітык Павел Севярынец.

Галасаванне адбылося 2 сакавіка на пасяджэнні арганізацыйнага камітэта па святкаванні Дня Волі. У мерапрыемстве, як адзначалася, узялі ўдзел прадстаўнікі Аб’яднанага пераходнага кабінета, Офіса Ціханоўскай, палітычных партый, а таксама суарганізатары акцый у Вільнюсе і Варшаве.

Мэта арганізацыйнага камітэта — “вызначыць агульныя прыярытэты і асноўныя пасылы гэтага года для святкавання Дня Волі, а таксама каардынаваць і падтрымліваць арганізацыю мерапрыемстваў беларускімі дыяспарамі ў розных гарадах і краінах”, гаворыцца ў паведамленні.

Задача камітэта — спрыяць “лепшай каардынацыі паміж ініцыятывамі і арганізатарамі акцый у розных гарадах”.

25 сакавіка дэмакратычна настроеная частка насельніцтва Беларусі адзначае Дзень Волі – гадавіну абвяшчэння Беларускай Народнай Рэспублікі (БНР) у 1918 годзе. У Беларусі гэтая дата афіцыйна не адзначаецца. Пасля прэзідэнцкіх выбараў 2020 года любыя спробы публічна адзначыць Дзень Волі заканчваюцца затрыманнямі і наступнымі судамі, як мінімум па адміністрацыйных абвінавачаннях. Гістарычныя падзеі, звязаныя з Беларускай Народнай Рэспублікай, паслядоўна дэманізуюцца дзяржаўнай прапагандай. Нацыянальныя сімвалы называюцца “калабарацыянісцкімі”, “нацысцкімі” і фактычна абвешчаныя па-за законам. Значэнне БНР для беларускай дзяржаўнасці лічыцца перабольшаным, а сама рэспубліка пазіцыянуецца як “марыянетачнае” ўтварэнне, створанае пад германскім пратэктаратам на завяршальным этапе Першай сусветнай вайны.

Пасля падзей 2020 года Дзень Волі беларусы ў асноўным адзначаюць за мяжой.