Банк развіцця адмовіўся праз санкцыі пагашаць еўрааблігацыі на паўмільярда долараў

Крыніца: старонка Банка развіцця ў "Фэйсбуку"

3 траўня, Позірк. Банк развіцця Рэспублікі Беларусь (БРРБ) заявіў аб немагчымасці пагашэння еўрааблігацый на суму 500 млн. долараў.

У сваім паведамленні банк спаслаўся на адсутнасць доступу да “вызначанай умовамі эмісіі заходняй разлікова-клірынгавай інфраструктуры”, у сувязі з чым ён не мае “тэхнічнай магчымасці накіравання сум асноўнага доўгу і назапашанага працэнтнага даходу па еўрааблігацыях <…> на карысць Плацежнага агента (Citibank, N. A., London Branch)”.

Праблемы ў БРРБ патлумачылі “недружалюбнымі дзеяннямі шэрагу замежных дзяржаў”, якія пацягнулі сярод іншага “закрыццё карэспандэнцкіх рахункаў у доларах і адключэнне ад сістэмы SWIFT”.

Разам з тым банк сцвярджае, што забяспечыў выкананне абавязацельстваў шляхам рэзервавання 2 траўня на адпаведных рахунках сумы асноўнага доўгу і назапашанага працэнтнага даходу для выплат на карысць трымальнікаў каштоўных папер і “гатовы неадкладна пачаць давядзенне выплат трымальнікам у адпаведнасці з эмісійнай дакументацыяй пасля адмены вышэйзгаданых санкцыйных абмежаванняў”.

Банк развіцця аператыўна паведаміць трымальнікам аб “забеспячэнні разлікаў па еўрааблігацыях з дапамогай даступных каналаў сувязі”.

28 чэрвеня 2022 года Савет міністраў і Нацыянальны банк прынялі сумесную пастанову, згодна з якой “выкананне даўгавых абавязацельстваў па дзяржаўных каштоўных паперах, размешчаных на знешніх фінансавых рынках, будзе ажыццяўляцца ў беларускіх рублях па курсе рэгулятара на дату плацяжу”.

З тых часоў Беларусь пералічвае плацяжы па даўгах у рублях на спецрахунак у “Беларусбанку”. Аплатнаму агенту ўлады прапанавалі самастойна забіраць сродкі з гэтага рахунку і разлічвацца з інвестарамі. Кампаніі Citigroup і Citibank адмовіліся выступаць агентамі ў дачыненні да беларускіх еўрабондаў.

Неўзабаве пасля гэтага міжнародныя рэйтынгавыя агенцтвы Fitch Ratings і Moody’s панізілі крэдытны рэйтынг Беларусі: першае заявіла, што дэфолт у краіне непазбежны, другое назвала сітуацыю дэфолтам.

Мінфін Беларусі раскрытыкаваў гэтыя рашэнні, але выплаты па валютных абавязацельствах у рублях працягнуліся.

ААТ “Банк развіцця Рэспублікі Беларусь” — спецыялізаваны дзяржбанк. Займаецца фінансаваннем інвестпраектаў, падтрымкай экспарту, малога і сярэдняга бізнесу. Знаходзіцца пад санкцыямі ЕС, Канады, Японіі, Новай Зеландыі, Украіны і Швейцарыі.