Ціханоўская спадзяецца, што наданне Новікаву прытулку ў Арменіі стане “пазітыўным прэцэдэнтам”

8 траўня, Позірк. На тое, што справа беларуса Яраслава Новікава, які атрымаў статус уцекача ў Арменіі, “стане пазітыўным прэцэдэнтам і дапаможа надалей вырашаць пытанні бяспекі” суайчыннікаў, выказала спадзеў дэмакратычны лідар Святлана Ціханоўская.

“Шчыра вітаю Яраслава і яго блізкіх з такой навіной і хачу падзякаваць уладам Арменіі за гэтае рашэнне і адкрытасць у камунікацыі, — напісала палітык у сваім тэлеграм-канале. — Пытанне Яраслава падымалі і прадстаўнікі дэмакратычных сілаў, і праваабаронцы, бо першасная задача — абараніць беларусаў і гарантаваць іх бяспеку”.

Новікава, які пакінуў Беларусь летась увесну, затрымалі 2 лютага 2024 года, калі ён з Грузіі перасёк мяжу з Арменіяй, каб зрабіць у Ерэване балгарскую візу. Высветлілася, што беларускія ўлады абвясцілі яго ў міждзяржаўны вышук СНД паводле арт. 435 КК (ухіленне ад мерапрыемстваў прызыву на вайсковую службу).

4 лютага суд у Арменіі ўзяў Новікава пад варту на 40 дзён для экстрадыцыі, пасля чаго Новікаў звярнуўся па палітычны прытулак. Выдачы мужчыны спрабавалі перашкодзіць армянскія праваабаронцы і беларускія дэмакратычныя сілы.

21 сакавіка прэс-служба дэмакратычнага лідара Святланы Ціханоўскай паведаміла “Позірку”, што на сустрэчы палітыка са спікерам парламента Арменіі Аленам Сіманянам абмяркоўвалася сітуацыя з Новікавым. Прадстаўнікі Арменіі тады паведамілі, што ён атрымае палітычны прытулак.

8 траўня “Медыязона” са спасылкай на юрыста Араіка Папікяна паведаміла, што мужчына атрымаў статус уцекача.