Пракуратура Польшчы пачала расследаванне ў дачыненні да суддзі, які ўцёк у Беларусь

8 траўня, Позірк. Нацыянальная пракуратура Польшчы пачала расследаванне ў дачыненні да суддзі Томаша Шмыта, які ўцёк у Беларусь, паведамляе інфармагенцтва РАР са спасылкай на прадстаўніка ведамства Пшэмыслава Новака.

Паводле яго слоў, Шмыт падазраецца ў здзяйсненні злачынства, прадугледжанага параграфам 2 арт. 130 Крымінальнага кодэкса (удзел у дзейнасці замежнай выведкі).

Гэты параграф прадугледжвае пакаранне не менш за 3 гады пазбаўлення волі.

Паводле інфармацыі пракурора, мэтай расследавання з’яўляецца высвятленне ўсіх абставінаў магчымага супрацоўніцтва Шмыта з замежнай выведкай, уключаючы аб’ём перададзенай інфармацыі.

Сярод іншага ў ходзе разбору будзе “прааналізаванае фінансавае, асабістае і прафесійнае становішча” збеглага суддзі, сказаў Новак.

Інфармацыя пра тое, што суддзя 2-га аддзялення Ваяводскага адміністрацыйнага суда Варшавы Томаш Шмыт “пакуль неафіцыйна” папрасіў “статус палітычнага ўцекача” ў Беларусі, з’явілася 6 траўня ў тэлеграм-канале, створаным трыма днямі раней ад яго імя на польскай і рускай мовах.

Паводле публікацыі, Шмыт вымушана пакінуў Польшчу “з прычыны нязгоды з палітыкай і дзеяннямі ўладаў”. Ён нібыта “падвяргаўся пераследам і пагрозам за самастойную палітычную пазіцыю”. Цяпер знаходзіцца ў Беларусі.

“Я хацеў бы дазволіць сабе звярнуцца непасрэдна да Аляксандра Лукашэнкі, — заявіў ён на прэс-канферэнцыі, арганізаванай дзяржінфармагенцтвам БелТА ў Мінску 6 траўня. — Я вельмі прашу прабачэння за маю смеласць, але дазволю сабе папрасіць апеку, ахову прэзідэнта і ў цэлым Беларусі”.

Падчас прэс-канферэнцыі Шмыт падпісаў “заяву аб адстаўцы з пасады суддзі Ваяводскага адміністрацыйнага суда”.

7 траўня Шмыт адзначыў у інтэрв’ю ТАСС, што Польшча будзе дамагацца яго экстрадыцыі ў сувязі з праверкамі, якія праводзяцца ў дачыненні да яго, у тым ліку падазрэннямі ў шпіянажы.

Прэм’ер-міністр Польшчы Дональд Туск заявіў 7 траўня, што спецслужбы Беларусі даўно працавалі са збеглым суддзёй Шмытам, яго стасункі з беларусамі “маюць даўнюю гісторыю”, гэта не справа “апошніх месяцаў”.