Новы кіраўнік МУС Польшчы ініцыюе стварэнне канстытуцыйнай камісіі па расследаванні ўплыву Беларусі і Расіі

10 траўня, Позірк. Томаш Семоняк, які заняў 10 траўня пасаду кіраўніка Міністэрства ўнутраных спраў і адміністрацыі Польшчы, падрыхтаваў законапраект аб стварэнні канстытуцыйнай камісіі па расследаванні ўплыву Беларусі і Расіі.

Пра гэта паведаміў падчас прэс-канферэнцыі пасля прызначэння новых міністраў прэм’ер-міністр краіны Дональд Туск, якога цытуе polsat.news.

Кіраўнік урада абвясціў, што Калегія спецыяльных службаў Польшчы збярэцца 10 траўня, каб працягнуць “размову аб расійскім і беларускім уплыве на грамадскае жыццё і пра сітуацыю ў Польшчы”, на якую яно магло паўплываць цягам апошніх гадоў.

Камісія па расследаванні расійскага ўплыву афіцыйна была створана з ініцыятывы былой кіруючай партыі “Закон і справядлівасць” у 2023 годзе. Пасля таго, як 29 лістапада 2023 года камісія прадставіла частковую справаздачу, у якой рэкамендавала не давяраць дзяржаўныя пасады сярод іншых цяперашнім прэм’еру Дональду Туску і кіраўніку МУС Томашу Семоняку, — палітычным праціўнікам кіроўнай на той момант партыі, Сейм камісію распусціў.

Зноў тэма расійскага і беларускага ўплыву пачала абмяркоўвацца, калі ў Беларусь з’ехаў суддзя Томаш Шмыт.

Прэм’ер-міністр Туск заявіў 7 траўня, што спецслужбы Беларусі даўно працавалі са Шмыдтам, ягоныя стасункі з беларусамі “маюць даўнюю гісторыю”, гэта не справа “апошніх месяцаў”.

У той жа дзень перабежчык заявіў ТАСС, што Польшча будзе дамагацца яго экстрадыцыі ў сувязі з праведзенымі ў дачыненні да яго праверкамі, у тым ліку падазрэннямі ў шпіянажы.

Польская пракуратура пачала адпаведнае расследаванне. 9 траўня стала вядома, што Дысцыплінарны суд Вышэйшага адміністрацыйнага суда задаволіў хадайніцтва пракурора аб магчымасці прыцягнення Шмыта да крымінальнай адказнасці. Такім чынам, ён пазбаўлены недатыкальнасці, што дазволіць выдаць ордэр на яго арышт.

Паводле слоў міністра юстыцыі Адама Боднара, былога суддзю могуць абвясціць у міжнародны вышук.

Інфармацыя пра тое, што суддзя 2-га аддзялення Адміністрацыйнага ваяводскага суда Варшавы Томаш Шмыт “пакуль неафіцыйна” папрасіў “статус палітычнага ўцекача” ў Беларусі, з’явілася 6 траўня ў тэлеграм-канале, створаным трыма днямі раней ад яго імя на польскай і рускай мовах.

Паводле публікацыі, Шмыт вымушана пакінуў Польшчу “з прычыны нязгоды з палітыкай і дзеяннямі ўладаў”. Ён нібыта “зведваў пераслед і пагрозы за самастойную палітычную пазіцыю”.

“Я хацеў бы дазволіць сабе звярнуцца непасрэдна да прэзідэнта Аляксандра Лукашэнкі, — заявіў ён на прэс-канферэнцыі, арганізаванай дзяржінфармагенцтвам БелТА. — Я вельмі прашу прабачэння за маю смеласць, але дазволю сабе папрасіць апеку, ахову прэзідэнта і ў цэлым Беларусі”.

Кіраўнік аддзела судовай інфармацыі Вышэйшага адміністрацыйнага суда Сільвестр Марціняк паведаміў 10 траўня, што Шмыт звольнены. Рашэнне напярэдадні прыняў старшыня Вышэйшага адміністрацыйнага суда па заяве Шмыдта, у якім пазначана, што ён “сыходзіць у адстаўку <…> з неадкладным уступленнем у сілу”.