Нацбанк: Сума наяўных грошай у абароце з пачатку года павялічылася на 7,3%
15 траўня, Позірк. Паводле даных Нацыянальнага банка, сума наяўных грошай у абароце (агрэгат М0) на 1 траўня 2024 года склала 10 млрд 166,5 млн рублёў, павялічыўшыся за месяц на 133,5 млн рублёў (на 1 красавіка — 10 млрд 33 млн; +1,3%).
У параўнанні з 1 студзеня сума наяўных грошай у абароце вырасла на 7,3% (на той момант складала 9 млрд 474,6 млн рублёў), 1 лютага — на 8,2% (9 млрд 396,9 млн), 1 сакавіка — на 4,2% (9 млрд 761,3 млн).
Пераводныя дэпазіты ад пачатку года скараціліся на 11,6% — з 15 млрд 29,4 млн да 13 млрд 284,8 млн рублёў.
Аб’ём наяўных грошай у абароце і пераводных дэпазітаў у нацыянальнай валюце (М1) знізіўся на 4,3% — з 24 млрд 504 млн да 24 млрд 451,3 млн.
Грашовая маса ў нацыянальным вызначэнні (М2) павялічылася з 40 млрд 238,2 млн да 40 млрд 571,4 млн (+0,8%), рублёвая грашовая маса (М2*) — з 41 млрд 998,5 млн да 42 млрд 466,1 млн (+1,1%), шырокая грашовая маса (М3) — з 75 млрд 668,5 млн да 77 млрд 806,5 млн (+2,8%).
Захаванне ў Беларусі наяўных грошай і бягучых рахункаў у якасці асноўнага драйвера росту грашовай масы “нясе інфляцыйна-дэвальвацыйныя рызыкі пры ўзнікненні знешніх шокаў”, гаварылася ў сакавіцкім макраэканамічным аглядзе Еўразійскага банка развіцця.
За 2023 год агрэгат М0 вырас на 37,44%, М1 — на 33,85%, М2 — на 34,28%, М2* — на 34,73%, М3 — на 23,56%.
Летась у студзені намеснік старшыні Нацбанка Сяргей Калечыц заявіў, што для падтрымання дзелавой актыўнасці ў краіне і адначасовага “абмежавання праінфляцыйных рызык” прырост сярэдняй шырокай грашовай масы па выніках года будзе ў межах 12–16%, пры гэтым “рублёвая грашовая база” павялічыцца на 10–12%.
У студзені эканамісты праекта “Кошт урада” адзначалі, што павелічэнне ролі наяўных грошай у эканоміцы нясе шэраг пагроз і рызык — ад “росту аб’ёму ценявых плацяжоў і шэрых схем бізнесу” да “падвышэння рызыкі раскручвання інфляцыі і дэвальвацыі”.
Эксперты нагадалі, што ў 2021 годзе аб’ём наяўных грошай у эканоміцы вырас на 596 млн рублёў (+14%), 2022-м — на 2 млрд 173 млн (+46%), за 2023-й — яшчэ на 2 млрд 581 млн (+48%). Рост іх аб’ёму, на думку “Кошта ўрада”, “практычна без прыпынку працягваўся з лютага 2022 года, з месячным перапынкам у кастрычніку 2023 года і рэзкім рыўком у снежні”.
"Кошт урада": У беларускай эканоміцы відавочная празмернасць грошай
18 красавіка, Позірк. Рост шырокай грашовай масы "па-ранейшаму ідзе з апярэджаннем інфляцыі", і ў тым ліку гэта тлумачыць праблему "цэнавага падстрэшка ў эканоміцы", гаворыцца ў экспрэс-аналізе медыяпраекта "Кошт урада". "Шырокая грашовая маса раздзімаецца шмат у чым за кошт хуткіх грошай …
