Барэль: ЕС працягне падтрымліваць усіх, хто выступае за дэмакратычную Беларусь
20 траўня, Позірк. Еўрапейскі саюз працягне падтрымліваць усіх, хто мужна выступае за незалежную і дэмакратычную Беларусь, гаворыцца ў заяве вярхоўнага прадстаўніка ЕС у замежных справах і палітыцы бяспекі Жазепа барэля ў сувязі з Міжнародным днём салідарнасці з беларускімі палітвязнямі, які адзначаецца 21 траўня.
Адзначаецца, што “з моманту смерці палітвязня і актывіста Вітольда Ашурка ў турме ў траўні 2021 года ў месцах пазбаўлення волі памерла яшчэ як мінімум пяць палітвязняў: Мікалай Клімовіч, Алесь Пушкін, Вадзім Храсько, Ігар Леднік і Аляксандр Кулініч”.
“Яны зведалі несправядлівы пераслед за свае палітычныя погляды і перакананні, не атрымлівалі належнай медыцынскай дапамогі і догляду”, — адзначыў дыпламат.
“Сёння ў Беларусі па-ранейшаму налічваецца каля 1,4 тыс. палітвязняў. Сотні з іх маюць сур’ёзныя праблемы са здароўем, інваліднасць, узрост старэйшы за 60 гадоў і псіхічныя расстройствы. Яны незаконна ўтрымліваюцца пад вартай, зведваюць катаванні і жорсткае абыходжанне”, — заявіў прадстаўнік ЕС.
“Рэжым усё часцей пераследуе і тых, хто збег з краіны. Еўрапейскі саюз асуджае апошнюю хвалю рэйдаў і канфіскацыі маёмасці палітычных актывістаў, якія працягваюць сваю дзейнасць у абарону свабоды ў выгнанні. 104 чалавекі былі дададзеныя ў спіс падазраваных у рамках масавага крымінальнага расследавання ў дачыненні да беларусаў за мяжой”, — адзначаецца ў заяве.
“У гэты дзень салідарнасці ЕС патрабуе неадкладнага і безумоўнага вызвалення ўсіх палітычных зняволеных і заклікае ўлады выконваць міжнародныя абавязацельствы Беларусі ў галіне правоў чалавека, у прыватнасці, забяспечыць доступ да адэкватных медыцынскіх паслуг без дыскрымінацыі па прыкмеце месца іх прадастаўлення”, — падкрэсліваецца ў дакуменце.
Праваабаронцы абвясцілі 21 траўня Днём салідарнасці з палітычнымі зняволенымі ў Беларусі пасля таго, як у гэты дзень тры гады таму ў папраўчай калоніі № 17 (Шклоў, Магілёўская вобласць) памёр Вітольд Ашурак.
Першапачаткова заяўленая прычына смерці — спыненне сэрца, аднак, паводле інфармацыі жонкі, у яго раней не назіралася праблем з гэтым органам. 25 траўня 2021 года цела Ашурка было перададзена родным з забінтаванай галавой. Сваякам заявілі, што цела выпусцілі пры выгрузцы з халадзільніка. 25 траўня Следчы камітэт апублікаваў відэазапіс з прыкметамі мантажу з камеры (меркавана — штрафнога ізалятара), на якім бачныя два спантанныя падзенні Ашурка. СК таксама заявіў, што Ашурак не скардзіўся на здароўе і адмаўляўся ад дапамогі і шпіталізацыі. У папярэднім пасведчанні аб смерці, выдадзеным сваякам і падпісаным магілёўскім упраўленнем Дзяржаўнага камітэта судовых экспертыз, прычына смерці не была паказаная (код МКБ-10 R99 “Іншыя недакладна пазначаныя і неўдакладненыя прычыны смерці”).
Сёлета 21-22 траўня ў сталіцы Швецыі адбудзецца канферэнцыя па Беларусі, якую арганізуе Стакгольмскі цэнтр усходнееўрапейскіх даследаванняў (SCEEUS), МЗС Швецыі і Шведскі інстытут міжнародных адносін. Яе пачатак прымеркаваны да Міжнароднага дня салідарнасці з палітвязнямі ў Беларусі. Чакаецца, што форум стане платформай для дэманстрацыі падтрымкі дэмакратычнага руху і забеспячэння “высокага прыярытэту” тэмы Беларусі ў еўрапейскім парадку дня”. Плануецца выступ беларускага дэмакратычнага лідара Святланы Ціханоўскай.