СК узбудзіў крымінальныя справы супраць усіх удзельнікаў выбараў у КР, пагражае адабраць маёмасць

21 траўня, Позірк. Следчы камітэт узбудзіў крымінальныя справы супраць усіх удзельнікаў выбараў у Каардынацыйную раду (КР), вынікае з заявы ведамства 21 траўня.

Фігурантамі з’яўляюцца 257 чалавек, іх абвінавачваюць паводле арт. 357 (змова з мэтай захопу дзяржаўнай улады), 361 (заклікі да мераў абмежавальнага характару), 361¹ (стварэнне экстрэмісцкага фарміравання) і 361⁴ (садзейнічанне экстрэмісцкай дзейнасці) Крымінальнага кодэкса.

“Паводле ўстаялага алгарытму, у межах расследавання крымінальнай справы атрымана інфармацыя аб прыналежных ім аб’ектах нерухомасці і маёмасці на тэрыторыі нашай краіны, — заявіў СК. — У цяперашні час праводзяцца следчыя дзеянні, у тым ліку агляды, ператрусы, накладанне арышту на маёмасць і іншыя працэсуальныя мерапрыемствы”.

Адзначаецца, што ведамствам “будуць прыняты вычарпальна меры па забеспячэнні прынцыпу непазбежнасці пакарання і кампенсацыі ўрону, у тым ліку ў рамках спецыяльнай вытворчасці”.

СК сцвярджае, што “паводле даных следства, у 2020 годзе прадстаўнікамі найбольш радыкальных ячэек” у Беларусі “была створана экстрэмісцкая арганізацыя, якая называецца “Кардынацыйнай радай”, “намінальным кіраўніком кансалідацыі радыкалаў была прызначана [Святлана] Ціханоўская”, у абавязкі якой “экстрэмісцкай ідэалогіі сярод розных дыяспар і злачынцаў”.

На думку ведамства, у 2024 годзе было прынята рашэнне “аб рэарганізацыі гэтай злачыннай групы з наступным прызначэннем новых лідараў экстрэмісцкіх ячэек”.

“Вядомымі збеглымі злачынцамі” ў рэлізе названы дзеячы апазіцыі Аляксандр Азараў, Павел Латушка, Вадзім Пракоп’еў. Згадваюцца “таксама менш вядомыя і зусім неангажаваныя прадстаўнікі радыкальнага свету”.

Выбары ў Каардынацыйную раду пачнуцца 25 траўня і працягнуцца тры дні — да 23:59 27 траўня. Першае пасяджэнне КР трэцяга склікання чакаецца 15 чэрвеня.

Камітэт дзяржаўнай бяспекі прызнаў усе 12 кааліцый кандыдатаў на выбары ў трэці склад Каардынацыйнай рады “экстрэмісцкімі фармаваннямі”.

Кааліцыя “Каманда Латушкі і Рух “За свабоду” на выбарах у КС паведаміла пра затрыманні блізкіх у Беларусі 20 траўня.

У межах крымінальнай справы, узбуджанай раней у дачыненні да палітэмігрантаў за святкаванне 25 сакавіка за мяжой Дня Волі, у Беларусі па месцы іх жыхарства працягваюцца ператрусы. У эфіры тэлеканала АНТ напярэдадні агучаная інфармацыя аб накладанні арышту на кватэру Яны Латушкі — дачкі Паўла Латушкі.

Яна таксама вылучаецца ў КР паводле гэтага спісу.

Аб арышце прыналежнай ёй нерухомасці ў Мінску ўпершыню паведамлялася больш за два гады таму.