Беларусь і РФ праводзяць лётна-тактычныя вучэнні

27 траўня, Позірк. Аб пачатку сумесных лётна-тактычных вучэнняў з сіламі і сродкамі ВПС і войскаў СПА Беларусі і ВКС Расіі паведаміла прэс-служба беларускага Міністэрства абароны 27 траўня.

Манеўры праводзяцца ў рамках “удасканалення адзінай рэгіянальнай сістэмы супрацьпаветранай абароны” і ў інтарэсах “павышэння ўзаемадзеяння і вывучкі органаў кіравання і лётнага складу”.

Асноўныя намаганні, паводле даных ведамства, будуць накіраваны на вырашэнне задач па “прыкрыцці дзяржаўных і ваенных аб’ектаў ад удараў сродкаў паветранага нападу”.

У вучэннях з беларускага боку задзейнічаны авіяцыя, падраздзяленні зенітных ракетных і радыётэхнічных войскаў, з расійскага — экіпажы разведвальнай, знішчальнай і армейскай авіяцыі.

“Будуць адпрацаваны пытанні кіравання разнастайнымі сіламі авіяцыі, а таксама арганізацыі ўзаемадзеяння пры выкананні імі вучэбна-баявых задач. Акрамя таго, на авіяцыйных палігонах экіпажам трэба практычна адпрацаваць шэраг пытанняў у інтарэсах прыкрыцця падраздзяленняў сухапутных войскаў”, — адзначылі ў Мінабароны.

Манеўры працягнуцца да 31 траўня.

3 мая пасля праверкі дзяжурных сіл ВПС і войскаў СПА Аляксандр Лукашэнка заявіў военачальнікам, што “гэта не проста ўражвае, а гэта прыстойна”. “Ні адна мэта міма вас не прайшла. Уся Беларусь, гэта бачна ў рэжыме рэальнага часу, вамі кантралюецца. А калі кантралюецца, вы выявілі своечасова ўсе мэты. Вы з імі справіліся. Дзе трэба — уразілі, дзе трэба — прымусілі да пасадкі і таму падобнае. Вы бачыце ўсё, што робіцца на сумежжы, разведка працуе добра, інфармацыя перадаецца”, — падкрэсліў ён.

У красавіку ён адзначаў, што войскі СПА абсталяваны “самай сучаснай тэхнікай і ўзбраеннем”, у выніку чаго яны “дэманструюць выдатную палявую вывучку падчас мерапрыемстваў аператыўнай і баявой падрыхтоўкі”.