Траіх польскіх вайскоўцаў абвінавацілі ў пагрозах мігрантам праз папераджальныя стрэлы на мяжы з Беларуссю

6 чэрвеня, Позірк. Пракуратура Польшчы прад’явіла траім вайскоўцам абвінавачванні ў перавышэнні паўнамоцтваў і стварэнні пагрозы жыццю і здароўю мігрантаў праз папераджальныя стрэлы на мяжы з Беларуссю, паведамляе партал Onet.

Адзначаецца, што ў канцы сакавіка вайскоўцы патрулявалі мяжу ў раёне Дубічэ-Цэркэўне (Падляскае ваяводства). Спрабуючы прадухіліць спробу парушэння мяжы з боку мігрантаў, яны зрабілі некалькі папераджальных стрэлаў, а калі нелегалы не адступілі, “пачалі страляць у зямлю перад імі”.

Сцвярджаецца, што ўсяго было здзейснена 43 стрэлы. Пасля гэтага мігранты адмовіліся ад спробы прарыву праз мяжу.

Інцыдэнт адбыўся ў тым жа раёне, дзе ў траўні быў паранены польскі вайсковец, падкрэсліваецца ў публікацыі.

Пра напады на польскіх вайскоўцаў і памежнікаў нелегальных мігрантаў, якія спрабавалі трапіць у ЕС з беларускай тэрыторыі, паведамлялася 28 і 31 траўня, а таксама 4 чэрвеня.

У параненага 3 чэрвеня ў раёне Белавежскай пушчы польскага памежніка лекары дыягнаставалі пералом асновы чэрапа і пашкоджанне вачніцы. СМІ паведамлялі, што “група агрэсіўна настроеных людзей” ударыла яго па галаве галінай дрэва. Памежнік шпіталізаваны, пагрозы яго жыццю няма.

29 траўня прэм’ер-міністр Польшчы Дональд Туск наведаў размяшчэнне памежнікаў у вёсцы Дубічэ-Цэркэўне (каля Белавежскай пушчы) і заявіў аб планах аднавіць 200-метровую буферную зону ля мяжы з Беларуссю.

1 чэрвеня віцэ-прэм’ер Польшчы — міністр нацыянальнай абароны Уладзіслаў Касіняк-Камыш паведаміў, што буферная зона на мяжы з Беларуссю павінна быць адноўленая 4 чэрвеня. Разам з тым 3 чэрвеня кіраўнік Міністэрства ўнутраных спраў і адміністрацыі Томаш Семоняк паведаміў, што вяртанне буфернай зоны будзе перанесена на больш позні тэрмін.

4 чэрвеня намеснік міністра нацыянальнай абароны гэтай краіны Цэзары Томчык заявіў, што сувязі з узрослым ціскам на мяжу з боку Беларусі Польшча правядзе кансультацыі аб вяртанні буфернай зоны, пасля чаго будзе прынятае тое ці іншае рашэнне.