Моладзь з акупаванага Мелітопаля па гранце Пуціна наведвае Мінск, будзе страляць з аўтамата

10 чэрвеня, Позірк. 32 студэнты і школьнікі з акупаванага Расіяй Мелітопаля (Запарожская вобласць Украіны) прыбываюць у Мінск 10 чэрвеня, вынікае з матэрыялаў дзяржСМІ.

Паездка працягнецца да 13 чэрвеня. Яна праходзіць у рамках праекта “На абароне межаў сваёй Айчыны”, які рэалізуе грамадская арганізацыя “Мясцовая нацыянальна-культурная аўтаномія беларусаў гарадской акругі Мелітопаль” на грант, выдзелены спецыяльным фондам Уладзіміра Пуціна.

Як вынікае з яго апісання, вышэйназваная арганізацыя выйграла грант у кірунку “захаванне гістарычнай памяці” і атрымала амаль 2,3 млн расійскіх рублёў (24,7 тыс. долараў ЗША).

Адной з мэтаў праекта заяўлена “пазбаўленне ад ілжывых ідэалаў і каштоўнасцяў”, каб даведацца “сапраўдную гісторыю Запарожжа” праз спадчыну Вялікай Айчыннай вайны і наведванне памятных месцаў, у тым ліку ў Беларусі.

Удзельнікаў павязуць у мемарыяльны комплекс” Хатынь”, музей ВАВ у Мінску, Нацыянальную бібліятэку, яны возьмуць удзел у майстар-класах па разборцы аўтамата Калашнікава і стральбе з яго, пісталета Макарава і страйкбольнага зброі.

9 чэрвеня ў Мінску выступіў “дзіцячы ансамбль “Алегра” з так званай “луганскай народнай рэспублікі”.

Афіцыйны Мінск і праўладныя грамадскія арганізацыі падтрымліваюць кантакты з тэрыторыямі Украіны, акупаванымі РФ.

У Растове-на-Доне не пазней за ліпень плануецца адкрыццё генеральнага консульства Беларусі. У яго акругу ўвойдуць Растоўская і Валгаградская вобласці РФ, а таксама акупаваныя расійскай арміяй тэрыторыі Украіны — так званыя “данецкая народная рэспубліка”, “луганская народная рэспубліка”, часткі Запарожскай і Херсонскай абласцей і анэксаваны раней Крым.

Кіраўнік т. зв. “днр” Дзяніс Пушылін наведваў Беларусь 27 ліпеня 2022 года. Аляксандр Лукашэнка сустрэўся з ім 18 красавіка 2023 года ў Мінску. Летась 15 чэрвеня амбасадар Беларусі ў РФ Дзмітрый Крутой падпісаў з Пушыліным “пагадненне аб пашырэнні партнёрства”.

7 чэрвеня на палях Пецярбургскага міжнароднага эканамічнага форуму дыпламат сустрэўся з кіраўніком акупацыйнай адміністрацыі падкантрольнай РФ часткі Запарожскай вобласці Яўгенам Баліцкім, пра што той заявіў у сацсетках. Афіцыйны беларускі бок аб сустрэчы не паведамляў.

30 верасня 2022 года Уладзімір Пуцін падпісаў “дакументы” аб уваходжанні ў склад РФ “данецкай і луганскай народных рэспублік”, а таксама “Запарожскай і Херсонскай абласцей”. За некалькі дзён да гэтага на часова акупаваных украінскіх тэрыторыях пад кантролем расійскіх вайскоўцаў прайшлі адпаведныя “рэферэндумы”.

На пачатку гэтага года Савет Рэспублікі Нацыянальнага сходу Беларусі дэ-факта прызнаў сепаратысцкія ўтварэнні “днр” і “лнр”. 6 студзеня на сайце верхняй палаты парламента з’явіўся прэс-рэліз, з якога вынікала, што член СР НС Дзмітрый Баскаў “узяў удзел у акцыі фонду [паралімпійца] Аляксея Талая ў арганізацыі знаходжання школьнікаў з Данецкай і Луганскай рэспублік у Мінску ў перыяд зімовых школьных вакацый”.

Разам з тым дэ-юрэ беларускія ўлады не прызналі незалежнасць “днр” і “лнр”, роўна як іх “далучэнне” да Расіі пасля “рэферэндумаў”, пры гэтым афіцыйны Мінск ухваляе агрэсію РФ супраць Украіны.

Прадстаўнікі афіцыйнага Мінска, а таксама Беларускага Чырвонага Крыжа і фонду паралімпійца Аляксея Талая займаюцца вывазам дзяцей з акупаваных Расіяй тэрыторый Украіны — “на аздараўленне”. У сувязі з гэтым дэмакратычныя сілы дамагаюцца выдачы Міжнародным крымінальным судом у Гаазе ордэра на арышт Лукашэнкі, як гэта было зроблена ў дачыненні да Уладзіміра Пуціна і дзіцячага амбудсмена РФ Марыі Львовай-Бяловай.