Беларусь адклікала амбасадара з Арменіі для кансультацый
13 чэрвеня, Позірк. Беларусь адклікала амбасадара Аляксандра Канюка з Арменіі для кансультацый, вынікае з паведамлення ў неафіцыйным тэлеграм-канале МЗС.
Адзначаецца, што ў гэтай дзяржаве склалася “складаная ўнутрыпалітычная сітуацыя”, аднак ставіцца пытанне: “Пры чым тут Беларусь?”
“Улічваючы развіццё сітуацыі, наш пасол з Ерэвана ў бліжэйшы час таксама прыбудзе ў Мінск”, — гаворыцца ў паведамленні.
“Недальнабачнай пазіцыяй” называецца спроба нібы “адцягнуць увагу ад унутраных праблем вобразам знешняга ворага”.
Сцвярджаецца, што Беларусь з Арменіяй звязваюць “даўнія блізкія, сяброўскія адносіны і агульная гісторыя, а таксама ўзаемавыгадны гандаль і цесныя дзелавыя кантакты”.
“Мы не збіраемся гэтыя адносіны пагаршаць, колькі б армянскае кіраўніцтва да гэтага не падштурхоўвалі знешнія гульцы, — сказана ў рэлізе. — Мы ніколі не рабілі нічога на шкоду нашым сябрам, не ўмешваемся ва ўнутраныя справы, паважаем армянскі народ і шчыра зычым яму кіраўнікоў, якія будуць сапраўды думаць пра будучыню краіны і дабрабыт людзей”.
13 чэрвеня прэм’ер-міністр Арменіі Нікол Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Мінску знаходзіцца Аляксандр Лукашэнка. Ён сказаў пра гэта ў кантэксце заяў Лукашэнкі аб карабахскім канфлікце на сустрэчы з прэзідэнтам Азербайджана Ільхамам Аліевым у сярэдзіне траўня.
Пасля заявы прэм’ера амбасадар Размік Хумаран быў выкліканы ў Ерэван для кансультацый.
12 чэрвеня дэмакратычны лідэр Святлана Ціханоўская вітала рашэнне Арменіі “замарозіць удзел ва ўзначаленай Масквой” Арганізацыі Дагавора аб калектыўнай бяспецы (АДКБ). Такім чынам яна адрэагавала на выступ Пашыняна, які абвінаваціў АДКБ у тым, што асобныя сябры “планавалі вайну” супраць Арменіі з Азербайджанам, і паведаміў пра магчымы выхад з блока.
“Гэты крок падкрэслівае прыхільнасць Арменіі да свайго нацыянальнага суверэнітэту. Армянскі народ заслугоўвае свабоднай, дэмакратычнай і мірнай будучыні ў Еўропе. Спадзяюся на больш цеснае супрацоўніцтва з Арменіяй”, — адзначыла палітык.
Пра жаданне больш працаваць з Ерэванам Ціханоўская ўжо заяўляла ў сакавіку гэтага года — на сустрэчы са спікерам парламента Арменіі Аленам Сіманянам на палях кангрэса Euronest.
Офіс Ціханоўскай вітае апошнія заявы Пашыняна, заявіў “Позірку” галоўны дарадца дэмлідара Франак Вячорка.
Палітык у кастрычніку мінулага года сустракалася з Пашынянам і кіраўніком МЗС гэтай краіны Араратам Мірзаянам, нагадаў ён.
24 лютага 2022 года Расія пачала поўнамаштабную вайну супраць Украіны. На першапачатковым этапе ўварвання беларуская тэрыторыя актыўна выкарыстоўвалася для ўводу войскаў, а таксама абстрэлу ўкраінскай тэрыторыі. Лукашэнка неаднаразова заяўляў, што падтрымлівае РФ у яе дзеяннях.
Афіцыйны Мінск актыўна супрацоўнічае з Баку, у тым ліку ў ваеннай сферы, нягледзячы на тое, што фармальна з’яўляецца саюзнікам Арменіі, якая фактычна варагуе з Азербайджанам.