Пекін разлічвае, што крызіс на беларуска-польскай мяжы будзе вырашаны “шляхам кансультацый” — МЗС КНР
25 чэрвеня, Позірк. Кітай разлічвае, што Польшча і Беларусь “будуць ставіцца адзін да аднаго з павагай” і вырашаць “праблемы на мяжы шляхам кансультацый”, заявіла 25 чэрвеня афіцыйная прадстаўніца МЗС КНР Мао Нінг.
Выданне wiadomosci.radiozet.pl паведамляе, што такім чынам Мао Нінг адказала на пытанне польскага інфармагенцтва PAP, ці мае намер Пекін спрыяць спыненню “агрэсіўных дзеянняў” Мінска на мяжы.
Дыпламат выказала надзею, што бакам удасца пазбегнуць “эскалацыі напружанасці”.
Прэзідэнт Польшчы Анджэй Дуда на перамовах са старшынём КНР Сі Цзіньпінам 24 чэрвеня ў Пекіне закрануў пытанні, звязаныя з “ціскам, гібрыднай атакай”, якую “беларускія ўлады праводзяць на польскай мяжы з 2021 года”. Па выніках сустрэчы палітык сказаў журналістам, што “падрабязна абмеркаваў сітуацыю” з кітайскім лідарам, паведаміў аб праблемах трансгранічнага руху, якія ўзніклі праз “негатыўнае стаўленне беларускіх уладаў”.
Усё больш агрэсіўныя дзеянні супраць Польшчы, адзначыў ён, выклікаюць “узмацненне жорсткасці пазіцыі грамадства ў пытаннях, звязаных з мяжой, а таксама яе перасячэннем”. “Відавочна, гэта мае свае наступствы і ў тым, што наогул тычыцца магчымасці рэалізацыі прыгранічнага руху. Я прадставіў прэзідэнту вельмі негатыўнае стаўленне [грамадства] да таго, што рэалізуюць беларускія ўлады ў гэтым аспекце”, — заявіў Дуда.
Пра намер абмеркаваць з Сі Цзіньпінам наступствы міграцыйнага крызісу на польска-беларускай мяжы Дуда заяўляў 22 чэрвеня, перад вылетам у Кітай. Ён увязаў гэтую праблему з эканомікай, патлумачыўшы, што праз сітуацыю на мяжы сутыкаецца з абмежаваннямі адзін з чыгуначных маршрутаў дастаўкі кітайскіх тавараў у Еўропу — той, які праходзіць праз Беларусь.
Міграцыйны крызіс, які працягваецца з вясны 2021 года, Варшава, Рыга і Вільнюс называюць “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка 25 чэрвеня ў Мінску на сустрэчы з сакратаром партыйнага камітэта Пекінскага ўніверсітэта Хао Пінам і прадстаўнікамі кітайскіх ВНУ, заявіў аб дамоўленасці з Сі Цзіньпінам, “калі Кітаю трэба”, выкарыстоўваць Беларусь у прасоўванні сваіх інтарэсаў у Еўропу.
