Ліквідаваная Федэрацыя хакея з мячом

26 чэрвеня, Позірк. Віцебскі абласны суд задаволіў пазоў Міністэрства юстыцыі аб ліквідацыі рэспубліканскага грамадскага аб’яднання “Федэрацыя хакея з мячом”, паведамляе праваабарончы партал “Віцебская вясна”.

Рашэнне 19 чэрвеня прыняў суддзя Віктар Быстроў.

16 чэрвеня “Позірк” паведамляў пра намер уладаў ліквідаваць восем спартыўных арганізацый.

Ва ўсіх выпадках адпаведныя іскавыя заявы пададзеныя ў суд Мінюстам або яго тэрытарыяльнымі органамі.

Федэрацыя хакея з мячом заснаваная ў 2002 годзе ў гарадскім пасёлку Баравуха Полацкага раёна (Віцебская вобласць), займалася развіццём віду спорту ў Беларусі.

Паводле даных праваабарончай арганізацыі Lawtrend, за перыяд пасля жніўня 2020 года і да канца траўня 2024-га ў Беларусі ліквідавана не менш за 1.665 некамерцыйных арганізацый (НКА) — аб’яднанняў, прафсаюзаў, фондаў, недзяржаўных устаноў і асацыяцый.