Зборная Беларусі па хакеі папярэдне ўключана ў лік прэтэндэнтаў на ўдзел у Алімпіядзе-2026

31 кастрычніка, Позірк. Міжнародная федэрацыя хакея (IIHF) уключыла зборныя Беларусі і Расіі ў лік патэнцыйных удзельнікаў Алімпійскіх гульняў 2026 года.

Як вынікае з паведамлення прэс-службы IIHF, беларускім хакеістам папярэдне выдзелена месца ў адборачным турніры, расійскім — адразу на Алімпіядзе.

Зборнай Беларусі вызначана вакансія ў групе D, у саперніках — каманды Славакіі і Казахстана.

Рашэнне IIHF не азначае вяртання беларускіх і расійскіх зборных да міжнародных спаборніцтваў. Яно прадугледжвае рэінтэграцыю двух зборных у хакейную супольнасць у выпадку зняцця абмежаванняў. Чакаецца, што адпаведнае пытанне будзе разгледжанае ў сакавіку наступнага года.

25 верасня кіраўнік Фінскага хакейнага саюза Хары Нумела заявіў, што пазіцыя хакейнай супольнасці па вяртанні зборных Беларусі і Расіі да спаборніцтваў пад эгідай Міжнароднай федэрацыі хакея “застаецца нязменнай”.

“Для таго, каб Расія і Беларусь вярнуліся [у сусветны хакей], [развязаная РФ і падтрыманая афіцыйным Мінскам] вайна [ва Украіне] павінна быць скончаная”, — падкрэсліў ён.

З-за поўнамаштабнай вайны ва Украіне, якую Расія пачала ў тым ліку з выкарыстаннем беларускай тэрыторыі, хакейныя зборныя дзвюх краін не былі дапушчаныя да чэмпіянату свету 2022 года ў Фінляндыі. 27 траўня таго года IIHF забараніла беларусам і расіянам удзельнічаць у першынстве свету 2023 года.

У апошні раз зборныя Беларусі і РФ краін удзельнічалі ў ЧС-2021. Беларусы занялі перадапошняе — 15-е месца, расіяне — 5‑е. Зімовыя Алімпійскія гульні пройдуць 6–22 лютага 2026 года ў італьянскіх Мілане і Корціна-д’Ампеца.