АПК назваў “немэтазгоднай” забарону на ўезд у Латвію беларускіх аўтамабіляў

15 ліпеня, Позірк. Абмежаванне “мабільнасці беларусаў” праз забарону на ўезд у Латвію аўтамабіляў з беларускай рэгістрацыяй з’яўляецца “немэтазгодным”, гаворыцца ў апублікаванай 15 ліпеня заяве Аб’яднанага пераходнага кабінету (АПК).

Падкрэсліваецца, што АПК “актыўна выступае за ўвядзенне абмежавальных мер, накіраваных на прадухіленне абыходу санкцый і зніжэнне патэнцыялу для працягу агрэсіўнай вайны супраць Украіны”.

“Мы разумеем, што першапрычынай такіх мер з’яўляюцца дзеянні рэжыму Лукашэнкі, у выніку якіх для Латвіі і ЕС ствараюцца рэальныя пагрозы бяспецы праз штучны міграцыйны крызіс на мяжы, а таксама іншыя недружалюбныя дзеянні”, — гаворыцца ў заяве.

АПК паведаміў, што “вядзе кансультацыі з упаўнаважанымі органамі Латвіі, Літвы і Польшчы па вышэйзгаданым пытанні”.

З 16 ліпеня асобам на легкавых аўтамабілях з беларускімі нумарамі будзе забаронена ўязджаць у Еўрасаюз праз пункты пропуску на мяжы Латвіі з Беларуссю і Расіяй.

Рыга пайшла на гэты крок, каб забяспечыць выкананне санкцый ЕС.

“Асоба з зарэгістраваным у Беларусі транспартным сродкам павінна будзе вярнуцца з пункта пропуску ў краіну, з якой яна мела намер уехаць у Латвію. У выпадку адмовы ад выканання патрабаванняў <…> транспарт можа быць канфіскаваны”, — гаворыцца ў публікацыі партала lsm.lv.

Забарона не распаўсюджваецца на транспарт, які выкарыстоўваюць дыпламаты.

Міністэрства юстыцыі распрацоўвае законапраект, які забараняе зарэгістраванаму ў Беларусі транспарту заставацца ў Латвіі і перасякаць мяжу транзітам. Аўтамабілі з беларускімі нумарамі, якія ўжо знаходзяцца на латвійскай тэрыторыі, давядзецца перарэгістраваць. Дакумент рыхтуецца да перадачы ў камісію Сейма па нацыянальнай эканоміцы, аграрнай, экалагічнай і рэгіянальнай палітыцы.

Гэтая норма ўжо дзейнічае ў дачыненні да зарэгістраванага ў РФ транспарту.

29 чэрвеня Савет ЕС прыняў новыя абмежавальныя меры эканамічнага характару ў дачыненні да Беларусі ў сувязі з удзелам рэжыму Аляксандра Лукашэнкі ў расійскай агрэсіі супраць Украіны. Сярод іншага была пашырана забарона на перавозку грузаў аўтатранспартам па тэрыторыі ЕС прычэпамі і паўпрычэпамі з беларускай рэгістрацыяй, у тым ліку пры перавозцы грузавікамі, зарэгістраванымі не ў Беларусі.

Акрамя таго, каб мінімізаваць рызыку абыходу санкцый, зарэгістраваным у ЕС кампаніям, якія належаць беларускім фізічным або юрыдычным асобам на 25% або больш, “павінна быць забаронена станавіцца аўтатранспартным прадпрыемствам або перавозіць тавары аўтатранспартам у саюзе, у тым ліку транзітам”.