Праваабаронцы паведамілі пра затрыманне спявачкі Грыбалёвай

1 лістапада, Позірк. Па месцы жыхарства затрыманая вядомая спявачка, актрыса і тэлевядучая Ларыса Грыбалёва, паведамляе праваабарончы цэнтр “Вясна”.

Паводле звестак праваабаронцаў, затрыманне адбылося “ўчора ці сёння”. У доме артысткі праведзены ператрус. У чым яе абвінавачваюць, невядома.

Грыбалёва ўключана ў неафіцыйны чорны спіс выканаўцаў, якім забаронена выступаць у Беларусі.

4 траўня Міністэрства інфармацыі вынесла пісьмовае папярэджанне ТАА “ЕўраПлюсТВ”, якое з’яўляецца заснавальнікам тэлепраграмы “Europa Plus TV”. У паведамленні ведамства адзначалася, што мера прынятая “за парушэнне нацыянальнага заканадаўства аб СМІ”.

Праўладныя тэлеграм-каналы ў той жа дзень раскрытыкавалі тэлеканал за допуск да эфіру ў якасці вядучай Грыбалёвай, якая падтрымала пратэсты ў 2020 годзе. Паводле звестак беларускага ПЕНа, на 31 жніўня не менш за 127 дзеячаў культуры знаходзілася ў няволі па палітычных абвінавачваннях. Культурныя дзеячы зазнаюць таксама адміністрацыйны пераслед, многія былі вымушаныя выехаць з Беларусі.