Аб’ёмы будаўніцтва жылля для шматдзетных зменшыліся на траціну

19 ліпеня, Позірк. У студзені — чэрвені 2024 года арганізацыі ўсіх формаў уласнасці пабудавалі 18,3 тыс. новых кватэр — на 5,2% менш, чым за аналагічны перыяд 2023 года (19,3 тыс.), сведчаць даныя Нацыянальнага статыстычнага камітэта.

У эксплуатацыю ўведзена 1 млн 687,5 тыс. квадратных метраў агульнай плошчы жылля (-4,1%; 1 млн 758,9 тыс.).

Для маючых патрэбу ў паляпшэнні ўмоў у першым паўгоддзі пабудавана 564,9 тыс. кв. м жылля (-19,6%; 702,2 тыс.), у тым ліку з дзяржпадтрымкай — 363,6 тыс. (-29,4%; 515 тыс.). У сельскіх населеных пунктах уведзена ў эксплуатацыю 586,7 тыс. кв. м жылля (-1%; 592,9 тыс.).

Для шматдзетных пабудавана 212,3 тыс. кв. м (-35%; 326,4 тыс.).

Аб неабходнасці змяніць падыход да забеспячэння грамадзян жыллём заявіў прэм’ер-міністр Раман Галоўчанка 19 сакавіка на нарадзе па пытанні жыллёвага будаўніцтва.

Адзначыўшы наяўнасць “пэўных складанасцяў з будаўніцтвам жылля, асабліва з дзяржпадтрымкай”, Галоўчанка выказаў меркаванне, што дзеючыя механізмы дзяржпадтрымкі “пачынаюць страчваць актуальнасць”, паколькі большасць людзей, якія мелі права на гэты від дапамогі, ім скарысталіся. Акрамя таго, назіраецца тэндэнцыя, калі грамадзяне, якія маюць права на дзяржпадтрымку, адмаўляюцца будаваць жыллё, сказаў прэм’ер-міністр.

21 снежня мінулага года Аляксандр Лукашэнка падпісаў указ № 433, якім адкарэктавана рашэнне аб дзяржаўнай падтрымцы грамадзян пры будаўніцтве, рэканструкцыі або набыцці жылых памяшканняў, якое дзейнічала каля 10 гадоў.

У адпаведнасці з папраўкамі, якія ўступілі ў сілу 1 студзеня гэтага года, дзяржпадтрымкай пры будаўніцтве жылля могуць скарыстацца ў тым ліку грамадзяне, якія маюць патрэбу ў паляпшэнні жыллёвых умоў, якія да 15 студзеня 2022 года атрымалі зямельныя ўчасткі “для будаўніцтва жылых дамоў у малых гарадах, пасёлках гарадскога тыпу і сельскіх населеных пунктах не па месцы пастаноўкі на ўлік маючых патрэбу”.

За студзень — травень у Еўразійскім эканамічным саюзе ў эксплуатацыю было ўведзена на 2% больш жылля, чым за першыя пяць месяцаў 2023-га: у Кыргызстане — у 1,6 разы, Арменіі — у 1,5, Казахстане — на 4,2%, Расіі — на 1,6%; у Беларусі зафіксавана зніжэнне на 1,7%.

Паводле звестак Белстата, у 2023 годзе арганізацыі ўсіх формаў уласнасці пабудавалі 47,4 тыс. кватэр, што на 4,01% менш, чым годам раней (49,4 тыс.), і на 9,54% менш, чым у 2021-м (52,4 тыс.).

На працягу мінулага года ў эксплуатацыю было ўведзена 4 млн 193,7 тыс. кв. м агульнай плошчы жылля (-0,79%, 4 млн 226, 2 тыс.; -4, 41%; 4 млн 387, 3 тыс.).

Еўразійская эканамічная камісія паведамляла, што ў 2023 годзе Беларусь заняла 4-е месца па ўводу ў эксплуатацыю жылля.