Чарговую групавую справу аб удзеле ў пратэстах разгледзяць у Брэсце — абвінавачваюцца восем чалавек

23 ліпеня, Позірк. Суд Ленінскага раёна Брэста 30 ліпеня пачне працэс над васьмю мясцовымі жыхарамі, абвінавачанымі паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

Праваабарончы цэнтр “Вясна” паведамляе, што ім інкрымінаваны ўдзел у акцыі пратэсту 10 жніўня 2020 года.

Весці працэс прызначаны суддзя Дзмітрый Шурын.

Па справе праходзяць Іван Амрэйчык, Васіль Ніпарка, Аляксей Самайлюк, Анатоль Закурка, Ігар Сарокін, Сяргей Дземідзюк, Мікіта Яхімовіч і Валянціна Жукоўская.

Двое апошніх прызнаныя палітвязнямі, пасля затрымання ў сакавіку гэтага года яны змешчаныя ў брэсцкае СІЗА №7.

У траўні 2021 года Жукоўская была асуджаная па брэсцкай “справе карагодаў” на 1,5 года абмежавання волі без накіравання ў папраўчую ўстанову адкрытага тыпу.

Сарокіна затрымалі ў лютым пасля вяртання з Польшчы, дзе ён працаваў электрыкам.

23 ліпеня “Вясна” таксама паведаміла пра затрыманне ў Баранавічах (Брэсцкая вобласць) пяці мясцовых жыхароў. Паводле звестак “Медыязоны”, сярод затрыманых Максім Громаў, Аляксей Пашкевіч і Аліна Сівец.

Сёлета ў Брэсце і Баранавічах рэгулярна праходзяць судовыя працэсы па крымінальных справах аб удзеле ў пратэстах.

Усяго асуджана не менш за 50 чалавек, пераважная большасць — да розных тэрмінаў пазбаўлення волі.