На вучэннях МУС супраць “масавых беспарадкаў” у Мінску практыкаваліся “баявыя плыўцы”

5 жніўня, Позірк. Аб правядзенні ў Цэнтры падрыхтоўкі кадраў МУС тактыка-спецыяльных вучэнняў органаў унутраных спраў паведаміла прэс-служба міліцэйскага ведамства 5 жніўня.

Неабходнасць “дбайнай адпрацоўкі дзеянняў пры спыненні масавых беспарадкаў, спробаў прарыву дзяржаўнай мяжы і тэрарыстычных нападаў прадыктаваныя геапалітычнай сітуацыяй у свеце”, адзначыла МУС.

Падчас манеўраў супрацоўнікі спецпадраздзяленняў унутраных войскаў і АМАПа прадэманстравалі “новыя прыёмы і элементы, якія выкарыстоўваюцца для адпрацоўкі розных уводных, у тым ліку пры вызваленні закладнікаў”, ужылі “новыя віды ўзбраення і экіпіроўкі”.

“Умоўным злачынным фарміраванням процідзейнічалі групы баявых плыўцоў, якія выкарыстоўвалі ў тым ліку катэр на паветранай падушцы. Дапамогу з сушы ім аказвалі супрацоўнікі САХРа на матацыклах, квадрацыклах і багі (палегчаны спартыўны аўтамабіль для гонак па перасечанай мясцовасці. — “Позірк”.). Для вырашэння пастаўленых задач таксама задзейнічаліся БТР і беспілотныя лятальныя апараты”, — гаворыцца ў прэс-рэлізе.

Паводле слоў кіраўніка МУС Івана Кубракова, адпаведныя вучэнні праходзяць ва ўсіх рэгіёнах.

Пра неабходнасць “старанна падрыхтавацца да нясення службы” ў перыяд выбарчай кампаніі па выбарах прэзідэнта ў 2025 годзе міністр заявіў 30 ліпеня ў Брэсце на пасяджэнні калегіі рэгіянальнага УУС.

“Расслабляцца нельга. Трэба быць гатовымі да любога развіцця падзей”, — падкрэсліў ён.

У паведамленні не ўказвалася, чаго менавіта баіцца Кубракоў, ведамства якога чатыры гады ў ліку іншых сілавікоў актыўна пераследуе грамадзян па палітычных матывах.