Кіраўнік Бюро нацбяспекі Польшчы: Імя Пачобута ўсплывала падчас перамоваў па абмене зняволенымі
7 жніўня, Позірк. Імя Анджэя Пачобута “усплывала” падчас перамоваў па абмене зняволенымі паміж ЗША і РФ, паведаміў 7 жніўня ў эфіры TVP Info кіраўнік Бюро нацыянальнай бяспекі Польшчы Яцэк Сявера.
“Ход такога кшталту перамоваў кожны раз сутыкаецца з рознымі цяжкасцямі, пра якія я не магу тут расказаць. Аднак намаганні па вызваленні спадара Пачобута працягваюцца”, — дадаў ён.
Паводле яго слоў, “гульня з Беларуссю па пытанні вызвалення апазіцыйнага актывіста, які рашуча прадстаўляе пазіцыю як беларуса, так і паляка, які крытыкуе аўтарытарную ўладу”, павінна весціся “па некалькіх франтах”.
“Гэта гульня, якая ўключае выкарыстанне эканамічнага ціску, палітычнага ціску, а таксама ціску з боку трэціх краін. Гэтая гульня вядзецца сёння”, — падкрэсліў Сявера.
4 жніўня 2024 года намеснік міністра замежных спраў Польшчы Анджэй Шэйна ў эфіры Polsat News паведаміў, што вызваленне Пачобута і іншых палітвязняў абмяркоўваецца “наўпрост з Беларуссю”.
17 ліпеня міністр унутраных спраў і адміністрацыі Польшчы Томаш Семаняк заявіў, што, “калі Беларусь вызваліць Анджэя Пачобута, пачне супрацоўнічаць з Польшчай па пытанні забойцы сяржанта Матэуша Сітэка і перастане спрыяць ціску на мяжы, то, несумненна, з’явяцца сігналы, якія адносіны з польскага боку”.
Днём пазней аналагічныя ўмовы разрадкі двухбаковых адносін аб’явіў МЗС Польшчы.
Польшча шукае “найбольш спрыяльны шлях” для вызвалення асуджанага ў Беларусі журналіста і актывіста Саюза палякаў Анджэя Пачобута, заявіў Семаняк 6 жніўня ў эфіры TVN24.
8 лютага 2023 года Гродзенскі абласны суд прыгаварыў Анджэя Пачобута да 8 гадоў пазбаўлення волі ў калоніі ва ўмовах узмоцненага рэжыму. Суддзя Дзмітрый Бубенчык прызнаў яго вінаватым на падставе ч. 3 арт. 130 і ч. 3 арт. 361 (заклікі да мераў абмежавальнага характару (санкцый), накіраваных на прычыненне шкоды нацыянальнай бяспецы) КК. Праваабаронцы прызналі Пачобута палітвязнем. Па неафіцыйнай інфармацыі, мужчына адмовіўся пісаць прашэнне аб памілаванні.
Вялікі абмен зняволенымі паміж Расіяй і Захадам адбыўся 1 жніўня. Польшча выдала агента ГРУ Паўла Рубцова, пры гэтым не атрымаўшы каго-небудзь са сваіх грамадзян.
