Польскія вытворцы занепакоеныя ростам імпарту ўгнаенняў з Беларусі і РФ
Калійныя ўгнаенні
8 жніўня, Позірк. Далейшы рост імпарту ўгнаенняў з Беларусі і Расіі ў Польшчу можа прывесці да выцяснення польскіх вытворцаў з рынку, заявілі прадстаўнікі Польскай палаты хімічнай прамысловасці і сектара вытворчасці ўгнаенняў 7 жніўня на сустрэчы з кіраўніцтвам Міністэрства сельскай гаспадаркі і развіцця сельскіх раёнаў.
Якім чынам падсанкцыйная прадукцыя трапляе на польскі рынак, не ўдакладняецца.
Вытворцы настойваюць на змене законаў, каб абмежаваць імпарт. У той жа час мясцовыя фермеры заяўляюць пра рэзкае падвышэнні цэн на ўгнаенні і праблему з доступам да польскіх угнаенняў.
Паводле інфармацыі Міністэрства сельскай гаспадаркі і развіцця сельскіх раёнаў, у сезоне 2022–2023 гадоў доля імпарту на ўнутраным рынку ўгнаенняў дасягнула 56%, паказаўшы двухразовы рост у параўнанні з папярэднім сезонам.
Міністр Чэслаў Сякерскі паведаміў, што ведамства пачынае працаваць над папраўкамі да закона “Аб угнаеннях і ўгнаенні”, аднак сектар вытворчасці адпаведнай прадукцыі знаходзіцца ў падпарадкаванні многіх органаў.
На думку чыноўніка, неабходна арганізаваць яшчэ адну сустрэчу, але ўжо з удзелам прадстаўнікоў іншых польскіх міністэрстваў, у кампетэнцыю якіх уваходзяць рашэнні, прапанаваныя сектарам.
ААТ “Беларуськалій”, вытворца калійных угнаенняў, знаходзіцца пад санкцыямі ЕС з 2022 года. Праз іх уплыў нарвежскі пастаўшчык калія Yara — адзін з найбуйнейшых у Еўропе пакупнікоў беларускіх угнаенняў — абвясціў пра спыненне супрацы з “Беларуськаліем”.
Пад санкцыямі ЕС, ЗША, Канады і Вялікабрытаніі знаходзіцца таксама беларускі вытворца азотных угнаенняў “Гродна Азот”.