КДБ дадаў у “спіс тэрарыстаў” яшчэ дзевяць чалавек (дапоўнена)

8 жніўня, Позірк. Камітэт дзяржаўнай бяспекі ўнёс у пералік “арганізацый і фізічных асоб, якія маюць дачыненне да тэрарыстычнай дзейнасці”, яшчэ дзевяць чалавек, вынікае з абноўленага дакумента ў тэлеграм-канале спецслужбы.

Сярод іх Яўген Абрамовіч (19 ліпеня ўнесены ў “спіс экстрэмістаў”), асуджаны паводле ч. 1 арт. 130 і ч. 1 арт. 205 Крымінальнага кодэкса, а таксама Барыс Грынкевіч, прызнаны вінаватым паводле арт. 130, 342 і 361¹ КК (стварэнне экстрэмісцкага фарміравання або ўдзел у ім). Тэрміны невядомыя.

Астатніх асоб, унесеных у абноўлены “спіс тэрарыстаў”, праваабарончая супольнасць прызнала палітвязнямі.

• Віктар Мярзлікін (таксама фігуруе ў “спісе экстрэмістаў”) — прыгавораны да 5 гадоў пазбаўлення волі паводле ч. 1 арт. 130, ч. 3 арт. 361, ч. 2 арт. 367, ч. 1 арт. 342 КК;
• Уладзімір Балабановіч — 3 гады пазбаўлення волі, арт. 130 і 361 КК;
• Сяргей Кулеш — 4 гады пазбаўлення волі, ч. 2 арт. 293 КК, удзельнік пратэстаў у Пінску (Брэсцкая вобласць);
• Уладзімір Нікіцін — 3 гады пазбаўлення волі, арт. 361 КК, вярнуўся ў Беларусь з-за мяжы;
• Глеб Сахар — тэрмін невядомы, арт. 130, 361, 369, 368, 361¹ КК;
• Артур Пядзько — 9 гадоў пазбаўлення волі, арт. 130 КК;
• Кацярына Новікава (фігуруе ў “спісе экстрэмістаў”) — 6,5 гады пазбаўлення волі, сем крымінальных артыкулаў, у тым ліку арт. 130. Паводле праваабаронцаў, жанчыну затрымалі на пачатку лета 2023 года ў начной кашулі, у ёй яна прабыла ў следчым ізалятары да першай перадачы ад родных. У лістах сярод іншага адзначала: “Ставілі на сцяг, білі ўсім кабінетам. Сказалі, што за мае інтэрвію, канал і за мае палымяныя звароты. У маёй першай адвакаткі, здаецца, сын працуе ў ГУБАЗіК (але гэта не дакладна)”.

Цяпер у “спісе тэрарыстаў” 1.238 пазіцый, папярэдняе абнаўленне было 12 ліпеня.

Абвешчаным “тэрарыстамі” зняволеным забаронена атрымліваць грашовыя пераводы.

З невядомага часу ведамства пачало публікаваць пералік у тэлеграм-канале. На сайце Камітэта дзяржбяспекі інфармацыя пра папаўненне адпаведнага спісу не абнаўлялася з лютага 2024 года — рэсурс не працуе.

26 красавіка адказнасць за ўзлом сайта КДБ узяла на сябе група ананімных хакераў “Кіберпартызаны”. У іх паведамленні гаварылася, што партал спецслужбы на той момант “не працуе ўжо больш за два месяцы” — а “ўсё таму, што “Кіберпартызаны” прабраліся туды яшчэ ўвосень 2023 года і выпампавалі ўсю даступную інфармацыю”.

Даведка “Позірку”:

• ч. 1 арт. 130 — наўмысныя дзеянні, скіраваныя на ўзбуджэнне расавай, нацыянальнай, рэлігійнай або іншай сацыяльнай варожасці або варажнечы паводле прыкметы расавай, нацыянальнай, рэлігійнай, моўнай ці іншай сацыяльнай прыналежнасці;
• ч. 1 арт. 205 — таемнае выкраданне маёмасці (крадзеж);
• ч. 2 арт. 293 КК — удзел у масавых беспарадках, які выявіўся ў непасрэдным здзяйсненні дзеянняў: арганізацыі масавых беспарадкаў, што суправаджаліся гвалтам над асобай, пагромамі, падпаламі, знішчэннем маёмасці або ўзброеным супрацівам прадстаўнікам улады;
• арт. 342 — арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх;
• ч. 1 арт. 342 — арганізацыя групавых дзеянняў, якія груба парушаюць грамадскі парадак і спалучаюцца з відавочным непадпарадкаваннем законным патрабаванням прадстаўнікоў улады або пацягнулі парушэнне працы транспарту, прадпрыемстваў, устаноў або арганізацый, або актыўны ўдзел у такіх дзеяннях пры адсутнасці прыкмет больш цяжкага злачынства;
• ч. 3 арт. 361 — публічныя заклікі да захопу дзяржулады, гвалтоўнай змены канстытуцыйнага ладу Беларусі, здрады дзяржаве, здзяйснення тэракту ці дыверсіі; ажыццяўлення дзеянняў, скіраваных на парушэнне тэрытарыяльнай цэласнасці Беларусі, прычыненне шкоды нацыянальнай бяспецы, у тым ліку на прымяненне мер абмежавальнага характару (санкцый); альбо распаўсюд матэрыялаў, якія ўтрымліваюць такія заклікі праз СМІ, інтэрнэт або службовай асобай пры выкананні службовых паўнамоцтваў;
• ст. 361¹ — стварэнне экстрэмісцкага фарміравання або ўдзел у ім;
• ч. 2 арт. 367 — паклёп у дачыненні да прэзідэнта ў публічным выступе, друкаваным або публічна дэманстраваным творы, СМІ, інтэрнэце з боку асобы, раней судзімай за паклёп або абразу, або абвінавачанай ў здзяйсненні цяжкага або асабліва цяжкага злачынства;
• ст. 368 — абраза прэзідэнта;
• ст. 369 — абраза прадстаўніка ўлады.