“Белгазпрамбанк” пачаў адкрываць уклады ў юанях

10 жніўня, Позірк. “Белгазпрамбанк” 10 жніўня пачаў адкрываць тэрміновыя ўклады ў кітайскіх юанях.

Паводле інфармацыі прэс-службы фінансава-крэдытнай установы, фізічным асобам — рэзідэнтам Беларусі прапануецца размяшчаць сродкі пад 2,5% гадавых на дэпазіт “На 7 месяцаў безадзыўны — лаяльны”. Мінімальная сума — 200 юаняў (каля 28 долараў).

На працягу месяца з моманту адкрыцця “магчыма папаўненне ўкладу на любую суму”.

Прэс-служба “Белгазпрамбанка” таксама паведаміла, што з 17 жніўня аформіць дэпазіт стане магчыма праз інтэрнэт-банкінг і мабільны дадатак.

27 верасня 1990 года ў Беларусі быў зарэгістраваны камерцыйны банк “Экаразвіццё”, які пасля серыі перайменаванняў з 28 лістапада 1997 года вядомы як “Белгазпрамбанк”.

Асноўнымі акцыянерамі “Белгазпрамбанка” з’яўляюцца ПАТ “Газпрам” (49,818%) і АТ “Газпрамбанк” (49,818%). ААТ “Газпрам трансгаз Беларусь” належыць 0,266% акцый, Дзяржкамітэту па маёмасці Беларусі — 0,097%, іншым акцыянерам — менш за 0,001%.

“Белгазпрамбанк” — адзін з найбуйнейшых камерцыйных банкаў Беларусі. У чэрвені 2020 года большасць членаў яго праўлення былі затрыманыя, у банку была ўведзена часовая адміністрацыя.

У траўні 2020 года ў сувязі з рашэннем удзельнічаць у прэзідэнцкіх выбарах пасаду старшыні праўлення “Белгазпрамбанка” пакінуў Віктар Бабарыка, які кіраваў установай больш за 20 гадоў. 18 чэрвеня таго ж года яго затрымалі паводле абвінавачання ў хабарніцтве і адмыванні грошай. Вярхоўны суд прыгаварыў яго да 14 гадоў калоніі ўзмоцненага рэжыму.

Увосень 2020 года Нацыянальны банк на працягу некалькіх месяцаў вёў перамовы з расійскімі акцыянерамі “Белгазпрамбанка” пра тое, каб уласнікі вярнуліся да кіравання даччыным банкам і сфармавалі новы склад праўлення. Вяртанне адбылося ў снежні таго ж года.

У канцы мінулага года Нацбанк аднёс “Белгазпрамбанк” да першай групы сістэмна значных банкаў на 2023-ты.

Сёлета 11 красавіка прэм’ер-міністр Канады Джасцін Трудо абвясціў пра новыя санкцыі для далейшага “ціску на пуцінскіх памагатых у Беларусі”. Сярод іншых пад абмежаванні трапіў “Белгазпрамбанк”.