У Краснадары створаць гандлёва-сервісны цэнтр МТЗ

21 лістапада, Позірк. Прэм’ер-міністр Раман Галоўчанка прыняў удзел у цырымоніі закладкі капсулы на месцы будаўніцтва ў Краснадары (Расія) мультыбрэндавага гандлёва-сервіснага цэнтра Belarus, паведаміла прэс-служба ўрада.

Паводле слоў прэм’ера, цырымонія з’яўляецца “знакавым мерапрыемствам” не толькі для Мінскага трактарнага завода, “лідара на постсавецкай прасторы па вытворчасці трактарнай тэхнікі, але і для ўсіх краснадарцаў”.

Галоўчанка заявіў, што ствараны цэнтр “будзе аб’ядноўваць у сабе не толькі продаж трактарнай тэхнікі і ўсіх спадарожных агрэгатаў, але і сервіс, суправаджэнне, капітальны рамонт, бягучы рамонт і гэтак далей”.

“Я ўпэўнены, што гэта месца стане цэнтрам прыцягнення для ўсіх працаўнікоў аграпрамысловага комплексу не толькі Краснадарскага краю, але і ўсіх бліжэйшых рэгіёнаў”, — сказаў кіраўнік беларускага ўрада.

Беларуская тэхніка, паводле яго сцвярджэння, “адрозніваецца сваёй надзейнасцю, працаздольнасцю, і ўносіць свой уклад ва ўмацаванне харчовай бяспекі Расіі”.

Чыноўнік адзначыў, што “беларускія вытворцы сельскагаспадарчай тэхнікі традыцыйна актыўна прымаюць удзел у падобных мерапрыемствах” і анансаваў нарошчванне прысутнасці Беларусі “на палях Кубані”.

“Сёлета плануецца паставіць каля паўтары тысячы трактароў. Фактычна палова ўсёй трактарнай тэхнікі і агрэгатаў, якія разам з ёй пастаўляюцца, у Кубані, у Краснадарскім краі — гэта беларуская тэхніка”, — падкрэсліў прэм’ер.

Да 1 студзеня 2024 года павінна быць адкрыта аддзяленне пасольства Беларусі ў Краснадары, адным з найбуйнейшых гарадоў поўдня Расіі, дзе пражывае больш за мільён чалавек. Гэта вынікае з адпаведнай пастановы Савета Міністраў ад 20 лістапада.

Гл. таксама:

Галоўчанка прапанаваў кіраўніку Краснадарскага краю “антысанкцыйныя” мадэлі пасажырскага транспарту