Улады Польшчы заклікалі жыхароў паведамляць пра падазроных асоб ля мяжы з Беларуссю
15 чэрвеня, Позірк. Улады Польшчы заклікалі жыхароў паведамляць пра падазроных асоб ля мяжы з Беларуссю, вынікае з інфармацыі Урадавага цэнтра бяспекі (УЦБ) на партале gov.pl.
“Увага: знаходжанне ў буфернай зоне, якая прылягае да мяжы з Беларуссю, забароненае. Выконвайце загады службаў. Будзьце пільныя і паведамляйце пра падазроных асоб”, — гаворыцца ў паведамленні УЦБ.
Абвестка з аналагічным зместам была разасланая абанентам мабільнай сувязі, якія знаходзяцца ў непасрэднай блізкасці ад буфернай зоны (частка Падляскага і Люблінскага ваяводстваў).
МУС Польшчы 15 чэрвеня таксама паведаміла, што інструктары аддзела па барацьбе з беспарадкамі паліцыі Падляшша правялі трэніроўку для вайскоўцаў і памежнікаў па “тактыцы дзеянняў кампактных падраздзяленняў”. “Падчас вучэнняў таксама абмяркоўваліся патэнцыйныя пагрозы на польска-беларускай мяжы”, — адзначыла ведамства.
13 чэрвеня ў Польшчы была створана буферная зона, якая ахоплівае ўчастак мяжы з Беларуссю працягласцю 60,67 км у граніцах тэрыторый памежных пастоў у Нарэўцы, Белавежы, Дубічэ-Царкеўнэ і Чаромсе. Уздоўж 44 км яна распасціраецца ўглыб краіны на 200 м, уздоўж 16 км у зоне запаведнікаў — на 2 км.
Забарона на знаходжанне ў гэтай зоне ўведзена на 90 дзён.
Абмежаванне доступу старонніх асоб скіраванае на “гарантаванне бяспекі насельніцтва, у тым ліку супрацоўнікаў паліцыі, памежнікаў і вайскоўцаў”. Гэтыя меры, як сцвярджаецца, таксама павінны “абмежаваць дзейнасць груп кантрабандыстаў, якія садзейнічаюць незаконным дзеянням”.
Пра напады на польскіх вайскоўцаў і памежнікаў нелегальных мігрантаў, якія спрабавалі трапіць у Еўрасаюз з беларускай тэрыторыі, публічна паведамлялася напрыканцы траўня і на пачатку чэрвеня. На пасяджэнні Рады нацбяспекі 10 чэрвеня ў Беластоку прэзідэнт Польшчы Анджэй Дуда заявіў, што за апошні час на ўсходняй мяжы было здзейснена 50 нападаў на салдат.
6 чэрвеня стала вядома пра смерць вайскоўца 1-й танкавай брыгады Матэвуша Сітака, параненага 28 траўня на мяжы з Беларуссю. Паводле інфармацыі Памежнай аховы Польшчы, Сітак зазнаў напад мігранта, які ў складзе вялікай групы спрабаваў незаконна перасекчы мяжу з боку Беларусі.
За некалькі гадзін да нападзення на вайскоўца, паводле інфармацыі ведамства, ад рук мігрантаў пацярпелі непасрэдна памежнікі.
Дэмакратычныя сілы Беларусі ўсклалі адказнасць за гібель памежніка і напады на мяжы на рэжым Лукашэнкі.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.