16 жніўня, Позірк. Савет міністраў дапоўніў пералік медыцынскіх паслуг, тарыфы на якія рэгулююцца Міністэрствам аховы здароўя, вынікае з пастановы ўрада № 596 ад 15 жніўня.
Дакумент апублікаваны 16 жніўня на Нацыянальным прававым інтэрнэт-партале, ён уступіць у сілу 1 лістапада 2024 года.
Згодна з пастановай, Мінздароўя па ўзгадненні з Міністэрствам антыманапольнага рэгулявання і гандлю будзе кантраляваць цэны на “прыёмы (кансультацыі) лекараў-спецыялістаў”.
Цяпер у пералік рэгуляваных дзяржавай медпаслуг уваходзяць “стаматалагічныя паслугі”, “дыягнастычныя паслугі (лабараторная, прамянёвая, ультрагукавая, функцыянальная і эндаскапічная дыягностыка)” і “медыцынскі агляд стану здароўя грамадзян для атрымання медыцынскай даведкі аб стане здароўя, якая пацвярджае прыдатнасць да кіравання аўтамабілямі з ручным кіраваннем”.
14 жніўня Міністэрства аховы здароўя ў афіцыйным каментары з нагоды ўступлення ў сілу пастановы ведамства № 128 ад 8 жніўня ўказала, што арганізацыі і індывідуальныя прадпрымальнікі, якія аказваюць платныя медпаслугі, “павінны ўключаць у кошт цану набыцця лекавых прэпаратаў і медыцынскіх вырабаў, якія выкарыстоўваюцца пры аказанні платных медыцынскіх паслуг”.
“З гэтага моманту выключаецца магчымасць прымянення гандлёвых надбавак у гэтым сегменце медпаслуг”, — гаворыцца ў каментары.
Дакумент таксама рэгулюе пытанні акруглення тарыфаў на платныя медпаслугі. Гэта зроблена для “недапушчэння перавышэння” гранічных максімальных тарыфаў, нарматыву рэнтабельнасці, максімальных надбавак і каэфіцыентаў.
20 траўня паведамлялася, што Камітэт дзяржаўнага кантролю выявіў шэраг парушэнняў у цэнаўтварэнні ў сферы аказання медпаслуг. У гэтай сувязі КДК і ўрад унеслі прапановы, а Мінздароўя паведаміла аб распрацаваным плане мерапрыемстваў для ліквідацыі выяўленых недахопаў.
Паводле слоў намесніка міністра аховы здароўя Аляксандра Старавойтава, перагледжаны парадак устанаўлення і прымянення тарыфаў на платныя медпаслугі, што “дасць магчымасць забяспечыць адзіныя падыходы да фарміравання сабекошту платных медыцынскіх паслуг”.
