Улады Японіі пацвердзілі затрыманне свайго суайчынніка ў Беларусі

5 верасня, Позірк. Факт затрымання 50-гадовага японца ў Беларусі “9 ліпеня за меркаванае парушэнне беларускага заканадаўства” пацвердзіла 4 верасня тэлеканалу NHK амбасада Японіі ў Мінску.

5 верасня гэтую інфармацыю пацвердзіў журналістам галоўны сакратар Кабінета міністраў Японіі Ёсімаса Хаясі. Паводле яго слоў, японскі консул сустрэўся з затрыманым, урад “аказаў яму максімальную падтрымку, у тым ліку звязаўся з яго сваякамі”.

Хаясі паведаміў, што “мужчына здаровы”, аднак не стаў раскрываць падрабязнасці, звязаныя з затрыманнем, спаслаўшыся на тое, што “справа знаходзіцца ў стадыі расследавання, а інфармацыя носіць асабісты характар”.

Паводле яго слоў, урад Японіі працягне аказваць мужчыну “максімальную падтрымку”.

Увечары 4 верасня тэлеграм-канал Агенцтва тэленавін, якое ўваходзіць у структуру Белтэлерадыёкампаніі, анансаваў паказ рэпартажу пра затрыманне грамадзяніна Японіі, які нібыта звязаны са спецслужбамі сваёй роднай краіны, у Беларусі займаўся зборам інфармацыі. Паводле інфармацыі “Нашай Нівы”, гаворка можа ісці пра выкладчыка японскай мовы на курсах у Інстытуце дадатковай адукацыі пры Гомельскім дзяржаўным універсітэце ім. Скарыны Наканісі Масатосі.