Лукашэнка назваў беларусаў, літоўцаў і палякаў “адным народам фактычна”

3 лістапада, Позірк. Беларусь адновіць адносіны з Літвой і Польшчай, “яны нікуды не падзенуцца”, заявіў Аляксандр Лукашэнка 3 лістапада падчас рабочай паездкі ў Астравецкі раён (Гродзенская вобласць).

“Асноўны прынцып — суседзі не могуць жыць дрэнна <…>. Бываюць рознагалоссі, сваркі і гэтак далей — гэта мінучы час. Прыйдуць часы, калі мы будзем жыць з імі так, як гэта было заўсёды, і ў савецкія часы”, — цытуе Лукашэнку яго прэс-служба.

Ён перакананы, што рана ці позна суседнія краіны “адновяць адносіны” з Беларуссю.

“У нас катастрофы няма. Я не кажу, што ў нас шыкоўнае жыццё ва ўсіх адносінах. Але ў нас чалавек… Калі ты хочаш зарабіць крыху больш для сям’і, ты зможаш”, — сказаў Лукашэнка.

Звяртаючыся да мясцовых жыхароў, ён параіў ім “не сварыцца з літоўцамі, палякамі”. “Мы адзін народ фактычна”, — рэзюмаваў Лукашэнка.

Раней ён неаднаразова называў “адным народам” беларусаў і расіян.

У 2016 годзе ў пасланні народу і Нацыянальнаму сходу ён заявіў: “Мы, яшчэ раз падкрэсліваю, — адзін народ, як каму б гэта не падабалася. Мы ад аднаго кораня выраслі — рускія і беларусы”.

У 2018 годзе на сустрэчы з прадстаўнікамі расійскіх СМІ Лукашэнка сказаў: “Мы — адзін народ. На гэтым стаялі і стаяць будзем. Так, мы можам па-рознаму размаўляць. Але памятайце: мы ніколі вам не здрадзім!”.

Таксама ён не аднойчы называў беларусаў “рускімі са знакам якасці”.