НАУ заявіла аб атаках з боку КДБ
28 верасня, Позірк. Камітэт дзяржаўнай бяспекі Беларусі “прадпрымае пастаянныя спробы, якія апошнім часам сталі больш актыўнымі, каб атрымаць інфармацыю, сабраную Народным антыкрызісным упраўленнем” аб міжнародных злачынствах рэжыму Аляксандра Лукашэнкі, заявіла “Позірку” прэс-служба НАУ.
“Гэтая інфармацыя рыхтуецца для перадачы ў Міжнародны крымінальны суд, уключаючы тыя матэрыялы, якія ўжо знаходзяцца ў распараджэнні Офіса пракурора МУС”, — адзначылі ў прэс-службе.
Там таксама паведамілі аб паступіўшых ад прадстаўнікоў рэжыму прапановах “аб “супрацоўніцтве” з мэтай атрымання магчымага “памілавання” ад імя Лукашэнкі” некаторым членам каманды НАУ.
“Таксама, пад выглядам супрацоўнікаў міністэрства абароны Украіны, КДБ Лукашэнка спрабаваў выбавіць важную для рэжыму інфармацыю. У далейшым асобы, якія ўжо прадстаўляліся супрацоўнікамі КДБ, рабілі спробы шантажу і пагроз”, — адзначылі ў прэс-службе.
У сувязі з гэтым НАУ заявіла, што працягвае сваю працу.
Аб націску на членаў каманды і іх сваякоў у Беларусі кіраўнік НАУ Павел Латушка паведамляў у красавіку.
На “ўрачыстай імпрэзе да Дня народнага адзінства” 17 верасьня Лукашэнка абурыўся намерамі дэмсілаў атрымаць ордэр на ягоны арышт.
“Ад збеглых. Ім не церпіцца вывесці з арэны палітычных дзеянняў прэзідэнта Беларусі. Дамовіліся аб тым, што Літва, як гэта было напярэдадні ці ў першыя дні спецыяльнай ваеннай аперацыі Расіі ва Украіне, ініцыюе ў міжнародным крымінальным судзе ў Гаазе разгляд беларускага пытання. Мэта — прыцягнуць прэзідэнта Беларусі да адказнасці і выключыць яго з позвы. Як яны пішуць, каб прэзідэнт Беларусі, калі пачнуцца мірныя перамовы ва Украіне, не змог прымаць удзел у гэтых перамовах”, — заявіў ён.
Пры гэтым Лукашэнка назваў гэта “планамі Захаду”.
“Мы вашых дзетак заўсёды прымаем сюды на лячэнне, адпачынак. Яны вельмі задаволены. Праўда, мяне ледзь у суд нейкі не зацягнулі”, — сказаў ён на сустрэчы з кіраўніком “данецкай народнай рэспублікі” Дзянісам Пушыліным 19 верасня ў Мінску.
Прадстаўнікі Мінска, а таксама Беларускага Чырвонага Крыжа займаюцца вывазам дзяцей з акупаваных Расіяй тэрыторый Украіны — “на аздараўленне”. У сувязі з гэтым дэмакратычныя сілы дамагаюцца выдачы Міжнародным крымінальным судом у Гаазе ордэра на арышт Лукашэнкі, як гэта было зроблена ў дачыненні да Уладзіміра Пуціна і дзіцячага амбудсмэна РФ Марыі Львовай-Бяловай.
Беларусь “катэгарычна абвяргае галаслоўныя абвінавачанні” ў дэпартацыі ўкраінскіх дзяцей, заявіў прадстаўнік краіны падчас інтэрактыўнага дыялогу з вярхоўным камісарам Арганізацыі Аб’яднаных Нацый па правах чалавека Фолькерам Цюркам у рамках 56-й сесіі Савета ААН па правах чалавека.
Тэрмінам “спецыяльная ваенная аперацыя (СВА)” расійскія і беларускія ўлады называюць поўнамаштабную вайну, якая вядзе РФ супраць Украіны з 24 лютага 2022 года.
КДБ вярбуе палітвязняў, вызваленых па памілаванні — праваабаронцы
27 верасня, Позірк. Камітэт дзяржбяспекі "масава і гвалтоўна" вярбуе палітвязняў, вызваленых у 2024 годзе па "так званым памілаванні", паведамляе праваабарончая ініцыятыва Dissidentby. Паводле звестак праваабаронцаў, супрацоўнікі спецслужбы "настойваюць на падпісанні [вызваленымі] шэрагу папер, згодзе на ўдзел у прапагандысцкіх відэароліках і …