ЕАБР: Рост даходаў і павелічэнне крэдытавання захаваюць высокі спажывецкі попыт у Беларусі

30 верасня, Позірк. Рост даходаў насельніцтва ў Беларусі, “нараўне з павелічэннем спажывецкага крэдытавання, будзе садзейнічаць захаванню высокага спажывецкага попыту ў эканоміцы”, гаворыцца ў штотыднёвым макрааглядзе Еўразійскага банка развіцця.

Аналітыкі канстатавалі, што ў краіне “захоўваецца высокі рост даходаў насельніцтва”. “Рэальны заробак вырас на 12,3% г/г (год да года. – “Позірк“.) у жніўні 2024 г. пасля 15,4% г/г у ліпені, — адзначана ў дакуменце. — Аплата працы расце высокімі тэмпамі ва ўсіх сектарах, у тым ліку ў бюджэтным, дзе заробкі ў рэальным выражэнні выраслі на 11,8% г/г у жніўні пасля 12,7% г/г у ліпені”.

“Пры гэтым у верасні чакаецца падвышэнне базавай стаўкі заработнай платы, а таксама павелічэнне выплат настаўнікам, што падтрымае рост зарплат у бюджэтнай сферы і эканоміцы ў цэлым”, — звярнулі ўвагу эксперты ЕАБР.

Згодна з важнейшымі прагнознымі (дэ-факта планавымі) параметрамі развіцця краіны на 2024 год, рэальныя наяўныя грашовыя даходы насельніцтва павінны вырасці на 3,5%, рэальныя заробкі — на 3,9%, намінальны сярэднямесячны заробак павінен складаць не менш як 2.087 рублёў (у бюджэтным сектары — не менш за 1.634).

Паводле даных Белстата, спажывецкія цэны ў жніўні 2024 года знізіліся на 0,1%, з пачатку года выраслі на 3,4%, у гадавым выражэнні — на 6%.