795 грамадзян Беларусі пераехала за год у Ізраіль па праграме рэпатрыяцыі

6 кастрычніка, Позірк. Беларусь стала шостай краінай па колькасці грамадзян, якія пераехалі ў Ізраіль з 16 верасня 2023 года па 19 верасня 2024-га па праграме рэпатрыяцыі.

Такія даныя ўтрымліваюцца ў сумеснай справаздачы Міністэрства рэпатрыяцыі і інтэграцыі Ізраіля і Яўрэйскага агенцтва (Сахнут), паведамляе партал vesty.co.il.

Усяго ў Ізраіль за гэты перыяд пераехала 31 тыс. чалавек з амаль 100 краін свету, гаворыцца ў дакуменце.

Больш за ўсё рэпатрыянтаў прыбыло з Расіі — 19.850, далей ідуць ЗША і Канада — 3.340 агулам, Францыя — 1.820, Украіна — 980, Беларусь — 795, Вялікабрытанія — 560, Аргенціна — 450, Грузія — 310, ПАР — 280, Бразілія — 250.

31% рэпатрыянтаў складаюць людзі ва ўзросце 18–35 гадоў, 21% — 36–50, 20% — 0–17, 13% — 51–60, 5% — 61–65, астатнія — старэйшыя за 65 гадоў. 52% рэпатрыянтаў — жаночага полу, 48% — мужчынскага.

У справаздачы адзначаецца, што гэтая хваля рэпатрыяцыі прайшла на фоне абвастрэння сітуацыі ў рэгіёне, выкліканага атакай групоўкі ХАМАС на Ізраіль 7 кастрычніка 2023 года.

У Ізраілі працягваецца распачатая ў кастрычніку мінулага года ваенная аперацыя Ізраіля ў сектары Газа, якая стала адказам на напад тэрарыстаў групоўкі ХАМАС на ўдзельнікаў музычнага фестывалю, які праходзіў 7 кастрычніка каля мяжы з Сектарам Газа. У выніку тэрарыстычнай атакі ў Ізраілі загінула 1,2 тыс. чалавек з 37 краін, у тым ліку трое грамадзян Беларусі; пацярпела 7,3 тыс.

23 верасня пачалася новая фаза вайны на Блізкім Усходзе: Ізраіль атакаваў тысячы цэляў у Ліване, Міністэрства аховы здароўя гэтай краіны паведаміла пра сотні забітых і тысячы параненых.

Ваенная аперацыя ў Ліване атрымала назву “Стрэлы поўначы”. Начальнік Генштаба Ізраіля пазначыў яе мэтай знішчэнне баявой інфраструктуры, якая выкарыстоўваецца баевікамі “Хізбалы”, а таксама вяртанне жыхароў паўночных раёнаў Ізраіля ў свае дамы, якія яны былі вымушаныя пакінуць у выніку пастаянных ракетных абстрэлаў (паводле даных ізраільскага боку, з кастрычніка мінулага года з Лівана было выпушчана не менш 7.000 ракет), а таксама запускаў беспілотных лятальных апаратаў з тэрыторыі Лівана.

Увечары 1 кастрычніка Іран зрабіў ракетную атаку на Ізраіль. Па тэрыторыі дзяржавы было запушчана каля 200 балістычных снарадаў.

Перад атакай у прыгарадзе Тэль-Авіва Яфа тэрарысты расстралялі людзей на прыпынку грамадскага транспарту. Загінула не менш за сем чалавек. Яшчэ 16 — у тым ліку грамадзянін Беларусі — атрымалі раненні рознай ступені цяжкасці.

У Корпусе вартавых ісламскай рэвалюцыі (КВІР) заявілі, што атака з’яўляецца адказам на забойства лідара ХАМАС Ісмаіла Ханіі, лідара “Хізбалы” Хасана Насралы і камандуючага КВІР Абаса Нільфрушана 20 верасня ў Бейруце.

Рэпатрыяцыя ў Ізраіль (алія) — вяртанне ў краіну людзей яўрэйскай нацыянальнасці. Рэгулюецца спецыяльным “Законам аб вяртанні”.