Лукашэнка заявіў, што “пойдзе на выбары прэзідэнта” (дапоўнена)

23 кастрычніка, Позірк. Аляксандр Лукашэнка “прыняў рашэнне балатавацца на новы тэрмін”, паведаміла ў сваім тэлеграм-канале расійская прапагандыстка, карэспандэнт тэлеканала “Расія 1” Вольга Скабеева.

Пра інтэрв’ю Лукашэнкі Скабеевай 23 кастрычніка паведаміла яго прэс-служба.

“Так, Оля, пайду на выбары прэзідэнта”, — цытуе супрацоўніца “Расіі 1” Лукашэнку.

Пра намер балатавацца на чарговы прэзідэнцкі тэрмін Лукашэнка заяўляў яшчэ 25 лютага гэтага года на выбарчым участку, пасля таго як прагаласаваў на выбарах у парламент і мясцовыя саветы дэпутатаў.

“Перадайце ім, што пайду [на выбары]!” — сказаў ён. Пад “імі” ў кантэксце размовы з дзяржСМІ Лукашэнка меў на ўвазе сваіх апанентаў.

“Людзі пачынаюць разумець: прэзідэнт у Беларусі — гэта вельмі цяжкая праца! І не кожны на гэта вырашыцца”, — дадаў тады Лукашэнка.

Аднак ужо 5 сакавіка на сустрэчы з актывам Беларускага саюза жанчын Лукашэнка заявіў, што не прыняў “канчатковае рашэнне” аб удзеле ў выбарах прэзідэнта ў 2025 годзе.

Тады ён адзначыў, што яго заява 25 лютага, азначае: “Я проста ім хацеў сказаць: “Пайду, супакойцеся”. Гэта не значыць, што я сказаў “пайду ці не пайду”.

“Усё будзе залежаць ад таго, як мы падыдзем да гэтых выбараў, — падкрэсліў Лукашэнка. — А раптам аб’явіцца чалавек, якому мы можам даверыць… Усякае можа быць, таму мы стварылі Усебеларускі народны сход. Не для Лукашэнкі. Я ўжо наеўся гэтай працы, гэта найцяжэйшая праца. Спаць кладзешся — думаеш пра гэта, калі не спіш — думаеш пра гэта, і прачынаешся раніцай — зноў пра гэта думаеш”.

23 кастрычніка Палата прадстаўнікоў прызначыла прэзідэнцкія выбары ў Беларусі на 26 студзеня 2025 года. Беларускія дэмакратычныя сілы заклікалі галасаваць на іх супраць усіх.

70-гадовы Лукашэнка знаходзіцца ва ўладзе ў Беларусі з 1994 года.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.