Нацыянальны сход Беларусі атрымае статус назіральніка ў Панафрыканскім парламенце

3 лістапада, Позірк. Дэлегацыя беларускіх парламентарыяў на чале са спікерам Палаты прадстаўнікоў Нацыянальнага сходу (ПП НС) Ігарам Сергяенкам наведае 4–5 лістапада Мідранд (ПАР) для ўдзелу ў пленарным пасяджэнні Панафрыканскага парламента (ПАП).

Як паведамляе прэс-служба ПП НС, дэпутатам з Беларусі “ўпершыню ў гісторыі прадастаўленая магчымасць выступіць на афіцыйнай цырымоніі адкрыцця сесіі ПАП, якая адбудзецца 4 лістапада 2024 года”.

“Плануецца падпісанне мемарандума аб супрацоўніцтве з Панафрыканскім парламентам, у адпаведнасці з якім Нацыянальнаму сходу Беларусі будзе прадастаўлены статус назіральніка ў гэтай арганізацыі”, — гаворыцца ў паведамленні.

Адзначаецца, што ў ПАР Сяргеенка правядзе сустрэчы з кіраўніцтвам ПАП, Нацыянальнай асамблеі ПАР, кіраўнікамі парламенцкіх дэлегацый краін Афрыкі.

Панафрыканскі парламент — орган Афрыканскага саюза, арганізацыі, заснаванай у 2002 годзе ў якасці правапераемніка Арганізацыі афрыканскага адзінства. У Афрыканскі саюз уваходзяць 55 краін кантынента.

Першая сесія ПАП адбылася ў 2004 годзе ў Адыс-Абебе (Эфіопія). Панафрыканскі парламент складаецца з 275 дэпутатаў, якія прадстаўляюць 55 дзяржаў.

Статус назіральніка ў ПАП мае Міжпарламенцкая асамблея СНД — міждзяржаўны орган, які ажыццяўляе парламенцкае супрацоўніцтва дзяржаў садружнасці.