“Белавія” аднавіла рэйсы з Брэста і Гомеля ў РФ

6 лістапада, Позірк. Нацыянальная авіякампанія “Белавія” аднавіла рэйсы з Брэста і Гомеля ў Расію, паведамляе тэлеграм-канал “ОтВинта. Авиация Беларуси”.

4 лістапада былі выкананы рэйсы з абодвух гарадоў у Маскву, 5 лістапада — з Гомеля ў Санкт-Пецярбург і Маскву.

Адзначаецца, што некаторыя самалёты “Белавія” ўсё яшчэ знаходзяцца на тэхабслугоўванні.

Аб прыпыненні “па тэхнічных прычынах” выканання рэйсаў нацыянальнага перавозчыка “Белавія” з Брэста і Гомеля ў Маскву і Санкт-Пецярбург стала вядома 29 кастрычніка.

28 кастрычніка былі адменены рэйсы з Гомеля і Брэста ў Маскву, якія значыліся ў раскладзе, 29 кастрычніка — з Гомеля ў Санкт-Пецярбург і Маскву.

“Белавія” сітуацыю не каментавала.

Як адзначаюць крыніцы тэлеграм-канала “ОтВинта. Авиация Беларуси”, прычына адмены рэйсаў у “недахопе бартоў з-за тэхабслугоўвання”.

Са спасылкай на дадзеныя авіясэрвісаў Flightradar24 і Planespotters сцвярджалася, што два самалёты авіякампаніі (“Эмбраер” і “Боінг”) зараз праходзяць тэхабслугоўванне.

“Яшчэ адзін “Эмбраер” задзейнічаны на выязную серыю хакейнага клуба “Дынама-Мінск” [у Кантынентальнай хакейнай лізе]”, — гаварылася ў паведамленні.

27 кастрычніка паведамлялася, што “Белавія” аб’явіла аб пераходзе на зімовы расклад і павелічэнні колькасці рэйсаў па некалькіх напрамках.

Згодна з абноўленым раскладам, штодзённымі стануць рэйсы з Мінска ў Баку (Азербайджан) і Дубай (ААЭ) — да гэтага было пяць і тры разы на тыдзень адпаведна.

Двойчы на ​​тыдзень (замест аднаго) будзе ажыццяўляцца з 23 лістапада пералёт па маршруце Мінск — Туркменбашы (Туркменістан).

Таксама павялічана частата палётаў у Маскву (РФ) з Брэста і Гомеля — да чатырох (тры) і сямі (пяць) раз у тыдзень адпаведна.

“Белавія” ажыццяўляе палёты ў дзесяць краін.

Авіякампаніі “Белавія” забаронена лятаць у краіны Еўрасаюза пасля інцыдэнту 23 мая 2021 года, калі ў выніку дзеянняў беларускіх уладаў у мінскім аэрапорце здзейсніў вымушаную пасадку самалёт ірландскай авіякампаніі Ryanair, які ляцеў з Афін у Вільнюс. На борце былі на той момант апазіцыйны блогер Раман Пратасевіч і яго сяброўка, расіянка Сафія Сапега. Яны былі затрыманыя, асуджаныя, але пасля памілаваныя.

2 сакавіка 2022 года, неўзабаве пасля поўнамаштабнага ўварвання Расіі ва Украіну, ЗША ўвялі ў дачыненні да “Белавія” абмежаванні, якія тычацца экспарту прадукцыі авіяцыйнай сферы і ліцэнзавання пэўных самалётаў і запчастак. 7 снежня 2023 года яны былі працягнутыя яшчэ на 180 дзён.

9 жніўня 2023 года “Белавія” патрапіла ў санкцыйны спіс ЗША.

3 лістапада 2023 года генеральны дырэктар авіякампаніі Ігар Чаргінец прызнаў, што планы па мадэрнізацыі флота самалётаў авіякампаніі “Белавія” былі парушаны з-за ўвядзення заходніх санкцый.