Коўшык: Было прынцыпова, каб “Белсатам” кіравалі беларусы, і палякі гэта пачулі

17 лістапада, Позірк. Прапанова ўзначаліць “Белсат” стала “вельмі нечаканай”, хоць размовы пра замену кіраўніцтва медыя “ішлі даўно”, заявіла Аліна Коўшык 17 лістапада ў эфіры тэлеканала.

Яна паведаміла, што зойме ў “Белсаце” пасаду галоўнага рэдактара.

Паводле слоў Коўшык, прапанова ўзначаліць канал паступала “многім людзям”, але “было складана знайсці тых, хто гатовы заняць гэтае месца”.

“Істотна тое, што “Белсат” цяпер перажывае складаны, крызісны час. І апошні год быў і вельмі нервовым, і нявызначаным. Мы зрабілі ўсё, што маглі, каб выратаваць сам канал. І тут было, шчыра скажу, заангажаванне з усіх бакоў. І з боку кіраўніцтва “Белсата”, і з боку палітычных структур, якія ў адзін голас казалі пра” Белсат”, — сказала медыяменеджар.

“І калі да мяне прыйшлі з прапановай [узначаліць канал], я зразумела што гэта такая апошняя дошка ратунку. <…> Памятаю, як усе казалі, што вельмі важна, каб беларусы ўзначалілі “Белсат”. Што гэта прынцыповы момант. І палякі гэта пачулі”, — дадала Коўшык.

Паводле яе слоў, рашэнне ўзначаліць канал яна прыняла пасля таго, як стала вядома, што цяперашні выконваючы абавязкі дырэктара “Белсата” Аляксей Дзікавіцкі “не застанецца на месцы”.

Пра тое, што Коўшык пакідае пасаду прадстаўніцы Аб’яднанага пераходнага кабінета (АПК) па нацыянальным адраджэнні ў сувязі з тым, што яна ўзначаліць тэлеканал “Белсат”, стала вядома 15 лістапада. 16 лістапада Коўшык абвясціла таксама аб выхадзе са складу Каардынацыйнай рады.

Да прыходу ў АПК у верасні 2022 года Коўшык 15 гадоў працавала на “Белсаце”, у тым ліку ў якасці галоўнай вядоўцы, рэдактара і прадзюсара тэлепраграм. Яна таксама была сузаснавальнікам Беларускага цэнтру салідарнасці ў Варшаве, праекту InBelKult 2.0, а таксама клуба “Беларускі Варшавы”.

Коўшык — гісторык паводле адукацыі. Выпускніца Гродзенскага дзяржаўнага ўніверсітэта імя Янкі Купалы, Цэнтра Усходняй Еўропы Варшаўскага ўніверсітэта і праграмы MBA ў галіне медыяменеджменту ў Стакгольмскай школе эканомікі ў Рызе (Латвія).

19 ліпеня на польскім партале Onet выйшаў артыкул, у якім паведамлялася, што 10 менеджараў тэлеканала “Белсат” падазраюцца ў датычнасці да фінансавых парушэнняў на тэлеканале, у іх ліку называліся былы дырэктар тэлеканала Агнешка Рамашэўска-Гузы і яе тагачасны намеснік (а пазней выканаўца абавязкаў дырэктара) Аляксей Дзікавіцкі.

Сцвярджалася, што кіраўніцтва канала падазраюць у заключэнні без тэндэру 248 кантрактаў, многія з іх не былі выкананыя.

Цяперашнія і былыя менеджары тэлеканала “Белсат” 23 ліпеня выступілі з заявай, у якой выказалі пратэст “супраць паклёпу”, апублікаванага 19 ліпеня парталам Onet. Дзікавіцкі адразу пасля выхаду матэрыялу напісаў на сваёй старонцы ў “Фэйсбуку”, што інфармацыя з’яўляецца “няпраўдай і паклёпам”.

8 ліпеня журналісты-расследавальнікі Radio ZET і RadioZET.pl Марыюш Гершэўскі і Радаслаў Груца паведамілі, што ліквідатар Польскага грамадскага вяшчання (TVP) Даніэль Горгаш “апавясціў пракуратуру аб фінансавых парушэннях” на “Белсаце”. 9 ліпеня Рамашэўска-Гузы абвергла абвінавачанні.

На пачатку ліпеня стала вядома, што “Белсат” увойдзе ў склад новай медыяструктуры — Цэнтра замежных праграм (ЦЗП), які аб’яднае тэлеканалы, што вяшчаюць на замежных мовах. Дэмсілы і каманда “Белсата” заклікалі кіраўніцтва Польшчы і TVP захаваць самастойнасць беларускага тэлеканала.

Асноўнай крыніцай фінансавання “Белсата” — сродкі МЗС Польшчы. У сакавіку Дзікавіцкі паведамляў, што ў 2023 годзе медыя атрымала ад ведамства 63 млн злотых (каля 15,8 млн долараў на сёння), а на 2024 год гэтая сума скарочаная да 40 млн злотых (крыху больш за 10 млн долараў). Такім чынам, фінансаванне зменшана на 36,5%.

Урад прэм’ер-міністра Дональда Туска пасля прыходу да ўлады па выніках парламенцкіх выбараў, якія адбыліся ў кастрычніку 2023 года, пачаў рэвізію грамадскіх і дзяржаўных СМІ, якія, на яго думку, адстойвалі інтарэсы толькі кіроўнай да гэтага партыі-канкурэнта “Закон і справядлівасць”.

Тэлеканал “Белсат” створаны для вяшчання на Беларусь у 2007 годзе на падставе дамовы паміж МЗС Польшчы і TVP.