Маладая жанчына загінула пад коламі цягніка ў Жодзіне

23 красавіка, Позірк. Пра гібель пад коламі цягніка ў Жодзіне (Мінская вобласць) 25-гадовай жанчыны паведаміў 23 красавіка Следчы камітэт.

Адзначаецца, што яна перасякала шляхі перад саставам, які рухаўся.

“Машыніст, заўважыўшы пешахода, распачаў усе магчымыя меры для прадухілення здарэння: неадкладна падаў гукавы сігнал і ўжыў экстраннае тармажэнне. Нягледзячы на гэта, пазбегнуць наезду не ўдалося”, — гаворыцца ў паведамленні.

“На месцы здарэння працавала следча-аператыўная група. Следчым з прыцягненнем спецыялістаў упраўлення Дзяржаўнага камітэта судовых экспертыз па Мінскай вобласці праведзены агляд, апытаныя відавочцы, прызначаны шэраг экспертных даследаванняў”, — адзначыў СК.

Ведамства падкрэсліла, што ўсе абставіны здарэння будуць устаноўленыя ягоным Жодзінскім гарадскім аддзелам, пры гэтым “асаблівая ўвага будзе нададзеная прычынам і ўмовам, якія спрыялі трагедыі“.

Таксама СК нагадаў правілы паводзін на чыгунцы.